സംസ്ഥാനത്ത് തൊഴിലുറപ്പ് പദ്ധതി തൊഴിലാളികള്‍ക്ക് ക്ഷേമനിധി ബോര്‍ഡ് വരുന്നു

സംസ്ഥാനത്ത് തൊഴിലുറപ്പ് പദ്ധതി തൊഴിലാളികള്‍ക്ക് ക്ഷേമനിധി ബോര്‍ഡ് വരുന്നു.
മഹാത്മാഗാന്ധി ദേശീയ തൊഴിലുറപ്പിലെയും അയ്യങ്കാളി നഗരതൊഴിലുറപ്പിലെയും തൊഴിലാളികള്‍ക്ക് മറ്റു ക്ഷേമനിധികളിലേതുപോലെ ആനുകൂല്യങ്ങള്‍ ഉറപ്പാക്കുകയാണ് ലക്ഷ്യം.

ക്ഷേമനിധിബോര്‍ഡ് രൂപവത്കരിക്കാന്‍ ഓര്‍ഡിനന്‍സ് ഇറക്കാനാണ് തീരുമാനം. ഇക്കാര്യം ഉടന്‍ മന്ത്രിസഭയുടെ പരിഗണനയ്ക്കുവരും.

മഹാത്മാഗാന്ധി പദ്ധതിയില്‍ സജീവമായ 19.62 ലക്ഷം പേര്‍ക്കും അയ്യങ്കാളി പദ്ധതിയിലെ രണ്ടുലക്ഷം പേര്‍ക്കും ക്ഷേമനിധി ആനുകൂല്യത്തിന് അര്‍ഹതയുണ്ട്. ബോര്‍ഡിന്റെ ഘടന, ആനുകൂല്യനിരക്ക് എന്നിവയില്‍ അന്തിമതീരുമാനമായിട്ടില്ല.

ആനുകൂല്യങ്ങള്‍

* അറുപത് വയസ്സ് തികയുമ്പോള്‍ പെന്‍ഷന്‍ കിട്ടുന്നതടക്കമുള്ള ആനുകൂല്യങ്ങള്‍. * 18 വയസ്സ് പൂര്‍ത്തിയായതും 55 വയസ്സ് തികയാത്തവരുമായ തൊഴിലാളികള്‍ക്ക് ക്ഷേമനിധിയില്‍ ചേരാം. രജിസ്റ്റര്‍ചെയ്ത തൊഴിലാളികള്‍ക്കേ ക്ഷേമനിധിയില്‍ അംഗത്വമെടുക്കാനാവൂ. പ്രതിമാസ വിഹിതം 50 രൂപ.

* പത്തുവര്‍ഷത്തില്‍ കുറയാതെ ക്ഷേമനിധിവിഹിതം അടയ്ക്കുന്നവര്‍ മരണപ്പെട്ടാല്‍ കുടുംബപെന്‍ഷന്‍ കിട്ടും. അസുഖംമൂലമോ അപകടത്തില്‍പ്പെട്ടോ മരണമുണ്ടായാല്‍ സഹായം.

* അംഗഭംഗമുണ്ടായി തൊഴില്‍ ചെയ്യാനാവാതെവന്നാല്‍ അടച്ചതുക പലിശസഹിതം തിരിച്ചുകിട്ടും. * ഗുരുതരമായ അസുഖം ബാധിച്ചവര്‍ക്കും സഹായം ഉറപ്പാക്കും.

* വനിതാ അംഗങ്ങള്‍ക്ക് വിവാഹത്തിന് സഹായം. പ്രസവാനുകൂല്യത്തിനു പുറമേ മക്കളുടെ പഠനാവശ്യത്തിനു സാമ്പത്തികസഹായം ഉള്‍പ്പടെയുള്ള പ്രോത്സാഹന പദ്ധതികള്‍. തൊഴിലുറപ്പ് തൊഴിലാളികള്‍ക്ക് ക്ഷേമനിധി ഏര്‍പ്പെടുത്തുന്നത് ഇന്ത്യയില്‍ ആദ്യമായാണ്. ഈ ആവശ്യം മേഖലയിലെ തൊഴിലാളിസംഘടനകള്‍ നേരത്തേ ഉന്നയിച്ചിരുന്നു.