K B ഗണേഷ് കുമാറിനെതിരെ കേസ്സ്

തെരഞ്ഞെടുപ്പ് സത്യവാങ്മൂലത്തിൽ വസ്തുതകൾ മറച്ചു വച്ചതിനും തെറ്റായി നൽകിയതിനുമാണ് കേസ്

കെ ബി ഗണേഷ്കുമാർ എം എൽ എ ക്കെതിരെ കേസ്സെടുത്ത് പത്തനാപുരം ചീഫ് ജുഡീഷ്യൽ മജിസ്ട്രേറ്റ് കോടതി. കഴിഞ്ഞ തിരഞ്ഞെടുപ്പിൽ നാമനിർദ്ദേശ പത്രികയോടൊപ്പം നൽകിയ സത്യവാങ്മൂലത്തിൽ വസ്തുതകൾ മറച്ചു വച്ചതിനാണ് കേസ്.

പത്തനാപുരം ബ്ലോക്ക് പഞ്ചായത്ത് അംഗവും കെ എസ് യു സംസ്ഥാന ഉപാദ്ധ്യക്ഷനുമായ എം ജെ യദുകൃഷ്ണനാണ് പരാതി നൽകിയത്.

സത്യവാങ്മൂലത്തിൽ ജംഗമ വസ്തുക്കളെ സംബന്ധിച്ച് സൂചിപ്പിച്ചിട്ടുള്ള പട്ടികയിൽ ഏതെങ്കിലും വ്യക്തി / സ്ഥാപനം / ട്രസ്റ്റ് /കമ്പനി യുമായി സ്ഥാനാർത്ഥിക്കോ ഭാര്യക്കോ സാമ്പത്തിക ഇടപാട് ഉണ്ടോ എന്ന ചോദ്യത്തിന് ഇല്ല എന്ന മറുപടിയാണ് നൽകിയിട്ടുള്ളത്

എന്നാൽ ഗണേഷ് കുമാറിൻ്റെ ഭാര്യ ബിന്ദു, വാളകം സ്വദേശിയായ മുരളീധരൻ പിള്ളക്ക് 2018ൽ രണ്ടു തവണയായി 30 ലക്ഷത്തോളം രൂപ ബാങ്ക് അക്കൗണ്ടിലൂടെ ബിസിനസ്സ് ആവശ്യങ്ങൾക്ക് കടമായി നൽകിയെന്നും ലാഭവും പലിശയുമടക്കം ഒരു കോടി 20 ലക്ഷം രൂപ തിരികെ ലഭിക്കാനുണ്ടെന്നും കാട്ടി കഴിഞ്ഞ വർഷം പുനലൂർ കോടതിയെ സമീപിച്ചിരുന്നു. (Official Suit No: 1/2022 കോപ്പി ചേർക്കുന്നു.)

ഈ സാമ്പത്തിക ഇടപാട് മന:പൂർവ്വം സത്യവാങ്മൂലത്തിൽ നിന്ന് ഒഴിവാക്കിയതാണെന്നും ആകയാൽ നിയമനടപടി സ്വീകരിക്കണമെന്നുമാണ് പരാതിയിൽ പ്രധാനമായും ഉന്നയിക്കുന്നത്.

കൂടാതെ ബിന്ദുവിൻ്റെ പേരിൽ ദുബായിലുള്ള രണ്ടു ഫ്ളാറ്റുകളെ സംബന്ധിച്ച് സത്യവാങ്മൂലത്തിൽ പറയുന്നുണ്ടെങ്കിലും വാങ്ങിയവർഷം രേഖപ്പെടുത്തിയില്ല. വാങ്ങുമ്പോൾ ഒരു കോടി രൂപ വിലയായെന്നും സത്യവാങ്മൂലം തയ്യാറാക്കിയ ദിവസം അതിന് 12 കോടി വിലയുണ്ടെന്നും കാണിച്ചിട്ടുണ്ട്. ഈ മുതൽ മുടക്ക് കാണിച്ച് നിക്ഷേപകൻ എന്ന നിലയിലാണ് യു എ ഇ സർക്കാരിൽ നിന്നും ഗോൾഡൻ വിസ സമ്പാദിച്ചതെന്നാണ് പരാതിക്കാരൻ്റെ മറ്റൊരാരോപണം. ഫ്ളാറ്റുകൾ വാങ്ങിയ തീയതി ഒഴിവാക്കിയതും വാങ്ങിയ വിലയുടെ 12 ഇരട്ടി മാർക്കറ്റ് വില കാണിച്ചതും കള്ളപ്പണം വെളുപ്പിക്കാനാണെന്നും പരാതിയിലുണ്ട്.

ഗണേഷ് കുമാറിനെ ഉടൻ മന്ത്രിസഭയിൽ എടുക്കുമെന്നിരിക്കെ ഈ കേസിന് രാഷ്ട്രീയ പ്രാധാന്യം ഏറെയാണ്.

ഹർജിക്കാരനു വേണ്ടി അഡ്വ. ഷാൻ എം ഹാജരായി