കേരളം
കൊവിഡ് വാക്സിൻ എടുത്ത് 14 ദിവസം കഴിഞ്ഞാൽ രക്തം ദാനം ചെയ്യാം
വാക്സിനെടുത്താൽ ഒരു മാസത്തേക്ക് രക്തം ദാനം ചെയ്യാനാകില്ലെന്നും, സമ്പൂർണ വാക്സിനേഷൻ വരുന്നതോടെ രക്തബാങ്കുകളിൽ ക്ഷാമം ഉണ്ടായേക്കുമെന്ന ആശങ്കകൾക്ക് വിരാമം.
കൊവിഡ് വാക്സിൻ എടുത്തവർക്ക് 14 ദിവസത്തിന് ശേഷം രക്തം ദാനം ചെയ്യാൻ അനുമതി. കേന്ദ്ര ആരോഗ്യ കുടുംബ ക്ഷേമ മന്ത്രാലയത്തിന്റെതാണ് അനുമതി. ഇതുസംബന്ധിച്ച ഉത്തരവ് പുറത്തിറങ്ങി.
മേയ് ഒന്ന് മുതൽ 18 വയസ്സിന് മുകളിൽ പ്രായമുള്ളവർക്ക് വാക്സിൻ നൽകിത്തുടങ്ങാൻ സർക്കാർ തീരുമാനിച്ചിരുന്നു. ഇതിനാൽ വാക്സിൻ എടുക്കുന്നതിന് മുൻപ് എല്ലാവരും രക്തം ദാനം ചെയ്യണമെന്നും സർക്കാർ വ്യക്തമാക്കിയിരുന്നു. ഈ സാഹചര്യത്തിലാണ് വിദഗ്ധസമിതി യോഗം ചേർന്ന് മാർഗ നിർദേശങ്ങൾ പുതുക്കിയത്.
ജീവനുള്ള വെെറസിനെ ഉപയോഗിച്ചുള്ള വാക്സിൻ അല്ലാത്തതിനാൽ (live attenuated vaccine) നീണ്ട കാലാവധി ആവശ്യമില്ലെന്നാണ് സമിതിയുടെ നിഗമനം. അതിനാൽ വാക്സിന്റെ ഓരോ ഡോസ് സ്വീകരിച്ച് 14 ദിവസം കഴിഞ്ഞ് രക്തം ദാനം ചെയ്യാം. രക്തദാനത്തിനുള്ള മറ്റ് മാനദണ്ഡങ്ങളെല്ലാം പാലിക്കേണ്ടതുണ്ടെന്നും സമിതി ശുപാർശ ചെയ്തിട്ടുണ്ട്.