രാജ്യാന്തരം
ക്ലബ് ഹൗസിന് പുതിയൊരു എതിരാളി കൂടി; ഇനി മത്സരം
കൊറോണ കാലത്ത് മലയാളികൾ കണ്ടെത്തിയ സോഷ്യൽ മീഡിയ ആപ്ലിക്കേഷനാണ് ക്ലബ് ഹൌസ്. മെയ് മാസത്തിലാണ് ക്ളബ്ഹൗസിന്റെ ആൻഡ്രോയിഡ് പതിപ്പ് എത്തിയത്. വർത്തമാനം പറയാനുള്ള സൈബറിടം ജനകീയമായത് അന്നാണ്. ഏതു വിഷയത്തെപ്പറ്റിയും ക്ലബ് ഹൗസിൽ സംസാരിക്കാം,അല്ലെങ്കിൽ കേൾവിക്കാരാകാം, ഇഷ്ടമായില്ലെങ്കിൽ ശല്യമുണ്ടാക്കാതെ ഇറങ്ങിപോകാം.
ക്ലബ് ഹൗസിൻ്റെ വളർച്ച പല ടെക് കമ്പനികളെയും ബദൽ ആപ്പുകൾ വിപണിയിലിറക്കാൻ നിർബന്ധിതരാക്കി. ക്ലബ് ഹൗസിന് സമാനമായ ഹോംപേജും ഇന്റർഫെയ്‌സുമായി എത്തിയിരിക്കുകയാണ് സ്പോട്ടിഫൈ ഗ്രീൻറൂമും. സെലിബ്രിറ്റി ന്യൂസ്, കോമഡി എന്നിങ്ങനെ നിരവധി വിഷയങ്ങളാണ് സ്പോട്ടിഫൈ ഗ്രീൻറൂമിൽ ലഭ്യമായുള്ളത്.
- ക്ലബ് ഹൗസിന് ഏറെക്കുറെ സമാനമായ ഹോംപേജും ഇന്റർഫെയ്‌സുമാണ് സ്പോട്ടിഫൈ ഗ്രീൻറൂമിലും.
- ക്ലബ് ഹൗസിൽ നിന്നും വ്യത്യസ്തമായി സ്പോട്ടിഫൈ ഗ്രീൻറൂം ചർച്ചകൾ റെക്കോർഡ് ചെയ്യാനും സാധിക്കും.
- സ്പോട്ടിഫൈ ലോഗിൻ ഉള്ള ഏതൊരു വ്യക്തിക്കും ഗ്രീൻറൂം ആപ്പും ഉപയോഗിക്കാം.
സംഗീതം, സംസ്കാരം എന്നി വിഷയങ്ങളിലും തത്സമയ സംവാദങ്ങൾ ഉടനെ സ്പോട്ടിഫൈ ഗ്രീൻറൂമിൽ ആരംഭിക്കുന്നതാണ്. കൂടാതെ പ്രൊഫഷണൽ അത്‌ലറ്റുകൾ, എഴുത്തുകാർ, സംഗീതജ്ഞർ, ഗാനരചയിതാക്കൾ, പോഡ്‌കാസ്റ്റർ‌മാർ എന്നിവരുമായുള്ള സംവാദങ്ങളും ഗ്രീൻറൂമിൽ ലഭ്യമാവും.
ഔദ്യോഗികമായി ട്വിറ്റർ ഹാൻഡിൽ സ്പോട്ടിഫൈ പുതിയ പ്രൊജക്റ്റിനെകുറിച്ച് അറിയിച്ചിട്ടുണ്ട്
Meet Greenroom! Today, we’re making Spotify’s new live experience available in its new form on iOS and Android in over 135 markets around the world. Learn more. https://t.co/340kb3kO1g
— Spotify News (@SpotifyNews) June 16, 2021
പേര് സൂചിപ്പിക്കും പോലെ ഓഡിയോ സ്ട്രീമിങ് ആപ്പായ സ്പോട്ടിഫൈ ആണ് ഗ്രീൻറൂമിന് പിന്നിൽ. ഈ വർഷം മാർച്ചിൽ ബെറ്റി ലാബ്‌സിന്റെ ലോക്കർ റൂം ആപ്പിനെ സ്പോട്ടിഫൈ ഏറ്റെടുത്തിരുന്നു. ഈ ആപ്പിനെയാണ് കെട്ടിലും മട്ടിലും മാറ്റം വരുത്തി സ്പോട്ടിഫൈയുടെ പ്രശസ്തമായ പച്ച നിറത്തിന്റെ പശ്ചാത്തലവും ചേർത്ത് ഗ്രീൻറൂം എന്ന പേരിൽ അവതരിപ്പിച്ചിരിക്കുന്നത്.
