കേരളം
ഭാഗ്യലക്ഷ്മി അടക്കമുള്ളവരുടെ ജാമ്യഹര്ജി ഇന്ന് പരിഗണിക്കും
സ്ത്രീകള്ക്കെതിരായ മോശം പരാമാര്ശം നടത്തിയ വിവാദ യൂട്യൂബര് വിജയ് പി. നായരെ മര്ദ്ദിച്ച കേസില് ഡബ്ബിംഗ് ആര്ട്ടിസ്റ്റ് ഭാഗ്യലക്ഷ്മി അടക്കം, മൂന്ന് പ്രതികള് ഹൈക്കോടതിയില് സമര്പ്പിച്ച മുന്കൂര് ജാമ്യഹര്ജി ഇന്ന് പരിഗണിക്കും. വിജയ് പി നായരുടെ മുറിയില് അതിക്രമിച്ച് കയറി ആക്രമിച്ചിട്ടില്ലെന്നും പ്രശ്നം പറഞ്ഞ് പരിഹരിക്കാനാണ് പോയതെന്നുമാണ് ഹര്ജിക്കാരുടെ വാദം.
അറസ്റ്റ് തടയണമെന്ന ഹര്ജിയില് സര്ക്കാര് ഇന്ന് നിലപാട് അറിയിക്കും. ഭാഗ്യലക്ഷ്മിക്ക് പുറമെ ദിയ സന, ശ്രീലക്ഷ്മി അറയ്ക്കല് എന്നിവരാണ് കോടതിയെ സമീപിച്ചത്. വിജയ് പി. നായരുടെ മുറിയില് അതിക്രമിച്ച് കയറി ആക്രമിച്ചിട്ടില്ലെന്നും പ്രശ്നം പറഞ്ഞ് പരിഹരിക്കാനാണ് പോയതെന്നും ഹര്ജിക്കാര് വ്യക്തമാക്കുന്നു.
എന്നാല് വിജയ് പി നായര് ഇങ്ങോട്ട് പ്രകോപനപരമായി പെരുമാറുകയായിരുന്നു. വിജയ് പി. നായരുടെ ലാപ്ടോപ്, മൊബൈല് ഫോണ് എന്നിവ പൊലീസിന് കൈമാറിയിരുന്നെന്നും മോഷണം നടത്താനുള്ള ഉദ്ദേശത്തോടെയല്ല ഇത് കൊണ്ടുപോയതെന്നും ഹര്ജിയില് പറയുന്നു.
കേസില് പൊലീസ് അറസ്റ്റ് ചെയ്യുമെന്ന ഭയമുണ്ടെന്നും അത് തങ്ങള്ക്ക് സമൂഹത്തിലുള്ള അംഗീകാരത്തെ മോശമായി ബാധിക്കുമെന്നതിനാല് അറസ്റ്റ് തടയണമെന്നുമാണ് ഭാഗ്യലക്ഷ്മി അടക്കമുള്ളവര് ഹര്ജിയില് ആവശ്യപ്പെടുന്നത്. യൂട്യൂബറെ മുറിയില് കയറി കൈയേറ്റം ചെയ്തെന്ന കേസില് മുന്കൂര് ജാമ്യം തള്ളിയതോടെ അറസ്റ്റിന് തുനിഞ്ഞ പൊലീസ് തല്ക്കാലം ഹൈക്കോടതിയില് മുന്കൂര് ജാമ്യാപേക്ഷ കൂടി നോക്കിയ ശേഷം മതി തുടര്നടപടികളെന്ന നിലപാടിലാണ്.
വിജയ് പി. നായരുടെ ലാപ്ടോപ്പും മൊബൈല്ഫോണും പൊലീസിലേല്പ്പിച്ചുവെന്നിരിക്കെ മോഷണക്കുറ്റം ചുമത്തിയ നടപടിയും കൈയേറ്റവും നിലനില്ക്കില്ലെന്നാകും പ്രധാനമായും ഇവര് വാദിക്കുക. ചുമത്തിയ കുറ്റങ്ങള് പരസ്പര വിരുദ്ധമാണെന്നും വാദിക്കും. അതേസമയം വീഡിയോ സഹിതം തെളിവുള്ളതിനാല് പിടിച്ചുപറി എന്നതിലുപരി, ദേഹോപദ്രവമേല്പ്പിച്ചുള്ള മോഷണക്കുറ്റം എന്ന നിലയിലേക്ക് പൊലീസ് നിലപാട് കടുപ്പിക്കും.
കൈയേറ്റം വ്യക്തമാണെന്നിരിക്കെ മുന്കൂര് ജാമ്യ ഹര്ജിയില് ഹൈക്കോടതി സ്വീകരിക്കുന്ന തീരുമാനമെന്താകുമെന്നത് നിര്ണായകമാണ്. ഭാഗ്യലക്ഷ്മി അടക്കമുള്ളവരുടെ ജാമ്യ ഹര്ജിയെ സെഷന്സ് കോടതിയില് പൊലീസ് ശക്തമായി എതിര്ത്തിരുന്നു.