എലിപ്പനി ബാധിച്ച് യുവതി മരിച്ചു

എലിപ്പനി ബാധിച്ച് യുവതി മരിച്ചു. പത്തനംതിട്ട തിരുമൂലപുരം പെമ്പള്ളിക്കാട്ട് മലയിൽ അമ്പിളിയാണ് മരിച്ചത്. കനത്ത മഴയെത്തുടർന്ന് എലിപ്പനി വ്യാപകമാകാൻ സാധ്യതയുള്ളതിനാൽ ജാഗ്രത പാലിക്കണമെന്ന് ആരോഗ്യവകുപ്പ് നിർദേശിച്ചു. ശരിയായ പ്രതിരോധ പ്രവർത്തനങ്ങളിലൂടെ എലിപ്പനി രോഗബാധയും ഇതുമൂലമുള്ള മരണവും ഒഴിവാക്കാൻ സാധിക്കും. എലി, അണ്ണാൻ, പശു, നായ, പൂച്ച എന്നിവയുടെ മലമൂത്ര വിസർജ്യങ്ങൾ കലർന്ന മലിനമായ ജലവുമായി സമ്പർക്കം ഉണ്ടാകുമ്പോഴാണ് രോഗാണുബാധ ഉണ്ടാകുന്നത്.

പെട്ടെന്നുണ്ടാകുന്ന പനി, കഠിനമായ തലവേദന, പേശീവേദന, കാൽമുട്ടിനു താഴെയുള്ള വേദന, കണ്ണിന് ചുവപ്പ് നിറം, മഞ്ഞപ്പിത്ത ലക്ഷണങ്ങൾ എന്നിവയെല്ലാം എലിപ്പനി ബാധയെത്തുടർന്ന് ഉണ്ടാകാം. രോഗം കരളിനെ ബാധിക്കുമ്പോഴാണ് മഞ്ഞപ്പിത്ത ലക്ഷണങ്ങളുണ്ടാകുന്നത്. വൃക്കകളെ ബാധിക്കുമ്പോൾ രക്തം കലർന്ന മൂത്രം പോവുക, മൂത്രത്തിന്റെ അളവ് കുറയുക, കാലിൽ നീര് എന്നീ ലക്ഷണങ്ങൾ ഉണ്ടാകുന്നു.

മലിനജല സമ്പർക്കം പരമാവധി ഒഴിവാക്കുക. മലിനജല സമ്പർക്കമുണ്ടായാൽ കാലും കയ്യും സോപ്പുപയോഗിച്ച് കഴുകണം. ദുരന്തമേഖലകളിൽ ശുചീകരണ, ദുരന്തനിവാരണ പ്രവർത്തനങ്ങളിൽ ഏർപ്പെടുന്നവർ, ശുചീകരണ തൊഴിലാളികൾ, വെള്ളപ്പൊക്ക ബാധിത പ്രദേശങ്ങളിൽ പ്രവർത്തിക്കുന്നവർ എന്നിവർ സുരക്ഷാ ഉപാധികളായ കയ്യുറ, കാൽമുട്ടു വരെയുള്ള പാദരക്ഷകൾ എന്നിവ ധരിക്കണം.

എലിപ്പനിക്കെതിരെ ഡോക്സി സൈക്ലിൻ പ്രതിരോധ ഗുളിക കഴിക്കുക. ഈ ഗുളിക എല്ലാ സർക്കാർ ആശുപത്രികളിലും സൗജന്യമായി ലഭ്യമാണ്. ആവശ്യമുള്ളവർ ആരോഗ്യ പ്രവർത്തകരുമായി ബന്ധപ്പെട്ട് അവരുടെ നിർദേശമനുസരിച്ച് ഗുളിക കഴിക്കണമെന്ന് ആരോഗ്യവകുപ്പ് അറിയിച്ചു.