കേരളം
എല്ലാ ഐടി ജീവനക്കാര്‍ക്കും വാക്‌സിന്‍ ഉറപ്പ്; കുത്തിവെപ്പിന് തുടക്കമായി
കേരളത്തിലെ ഐടി പാര്‍ക്കുകളില്‍ വിവിധ കമ്ബനികളില്‍ ജോലി ചെയ്യുന്ന എല്ലാ ജീവനക്കാര്‍ക്കും അവരുടെ കുടുംബാഗംങ്ങള്‍ക്കും കോവിഡ് വാക്‌സിന്‍ നല്‍കുന്ന സംസ്ഥാന തല പദ്ധതിക്ക് തുടക്കമായി. ടെക്‌നോപാര്‍ക്കില്‍ പ്രവര്‍ത്തിക്കുന്ന ടെക്‌നോപാര്‍ക്ക് എംപ്ലോയീസ് കോഓപറേറ്റീവ് (ടെക്ക്) ഹോസ്പിറ്റലിന്റെ മേല്‍നോട്ടത്തിലാണ് വാക്‌സിനേഷന്‍ നടക്കുന്നത്.
പാര്‍ക്കിലെ എച്ച്‌ ആന്റ് ആര്‍ ബ്ലോക്ക് സ്ജ്ജീകരിച്ച ക്യാമ്ബില്‍ ശനിയാഴ്ച കുത്തിവെപ്പ് ആരംഭിച്ചു. അടുത്ത ഘട്ടങ്ങളിലായി കൊച്ചി ഇന്‍ഫോ പാര്‍ക്കിലും കോഴിക്കോട് സൈബര്‍ പാര്‍ക്കിലും വാക്‌സിനേഷന്‍ ക്യാമ്ബുകള്‍ ടെക്ക് ഹോസ്പിറ്റലിന്റെ നേതൃത്വത്തില്‍ നടക്കും.
ഐടി പ്രൊഫഷനലുകളുടേയും അവരുടെ കുടുംബാംഗങ്ങളുടേയും സുരക്ഷിതത്വം ഉറപ്പാക്കുന്നതിന് കേരള സര്‍ക്കാര്‍ ഐടി പാര്‍ക്കുകളും ഐടി കമ്പനികളും കൈകോര്‍ത്ത് പുതിയൊരു ചുവട് വച്ചിരിക്കുകയാണ്. ഈ വാക്‌സിനേഷന്‍ പദ്ധതി സംസ്ഥാനത്തുടനീളമുള്ള ഐടി കാമ്പ്യസുകളിലെ തൊഴില്‍ അന്തരീക്ഷം പൂര്‍വ്വസ്ഥിതിയിലാക്കുന്നതിനും ജീവനക്കാരെ വേഗത്തില്‍ തിരികെ എത്തിക്കാനും സഹായിക്കുമെന്ന് കേരള ഐടി പാര്‍ക്‌സ് സിഇഒ ജോണ്‍ എം തോമസ് പറഞ്ഞു. ഏറെ വെല്ലുവിളികള്‍ നേരിടുന്ന സമയത്ത് ഐടി സമൂഹത്തിനും അവരുടെ കുടുംബത്തിനും ഐടി കമ്ബനികള്‍ക്കും ഏറെ ആശ്വാസം നല്‍കാന്‍ ഈ ഉദ്യമത്തിലൂടെ കഴിയുമെന്നാണ് പ്രതീക്ഷയെന്നും അദ്ദേഹം പറഞ്ഞു.
രണ്ടു ലക്ഷം കോവിഷീല്‍ഡ് വാക്‌സിനാണ് ഈ പദ്ധതിക്കു വേണ്ടി പൂനെ സിറം ഇന്‍സ്റ്റിറ്റ്യൂട്ടില്‍ നിന്ന് ടെക്ക് ഹോസ്പിറ്റല്‍ നേരിട്ടു വാങ്ങിയിരിക്കുന്നത്. ആദ്യ ബാച്ചില്‍ 25,000 ഡോസാണ് എത്തിയത്. വിവിധ ഐടി പാര്‍ക്കുകളില്‍ പ്രവര്‍ത്തിക്കുന്ന ചെറുതും വലുതുമായ നിരവധി കമ്പനികള്‍ക്ക് വലിയ ആശ്വാസമാണ് ഈ പദ്ധതി. തിരുവനന്തപുരം ടെക്‌നോപാര്‍ക്കിലേയും കൊച്ചി ഇന്‍ഫോ പാര്‍ക്കിലേയും ഏതാനും വന്‍കിട കമ്ബനികള്‍ അവരുടെ ജീവനക്കാര്‍ക്ക് സ്വന്തം നിലയില്‍ വാക്‌സിന്‍ നല്‍കിത്തുടങ്ങിയിട്ടുണ്ട്.
