ദേശീയം
നോബല് പ്രൈസ് ഓഫ് കമ്പ്യൂട്ടിങ്; 2020-ലെ ടൂറിങ് പുരസ്കാരങ്ങൾ പ്രഖ്യാപിച്ചു
കമ്പ്യൂട്ടര് സയന്സ് രംഗത്തെ അത്യുന്നത പുരസ്കാരമായ ടൂറിങ് പുരസ്കാരങ്ങൾ പ്രഖ്യാപിച്ചു. പുരസ്കാരത്തിന് ആല്ഫ്രഡ് അഹോയും ജെഫ്രി ഉള്മാനും അര്ഹരായി. കമ്പ്യൂട്ടര് പ്രോഗ്രാമിങ് ഭാഷകളുടെ പിന്നിലുള്ള മൗലിക ആശയങ്ങള് കണ്ടെത്തിയതിനാണ് പുരസ്കാരം. 1960 കളിലാണ് കണ്ടെത്തല് നടന്നത്. ടൂറിങ് അവാര്ഡിനെ ‘നോബല് പ്രൈസ് ഓഫ് കമ്പ്യൂട്ടിങ്’ എന്നാണ് വിശേഷിപ്പിക്കുന്നത്.
എ.സി.എം.(അസോസിയേഷന് ഫോര് കമ്പ്യൂട്ടിങ് മെഷിനറി) ആണ് പുരസ്കാരം പ്രഖ്യാപിച്ചത്. ബ്രിട്ടീഷ് ഗണിതശാസ്ത്രജ്ഞനായ അലന് എം. ടൂറിങ്ങിന്റെ പേരിലാണ് പുരസ്കാരം നല്കുന്നത്. കൊളംബിയ സര്വ്വകലാശാലയിലെ കമ്പ്യൂട്ടര് സയന്സ് വിഭാഗത്തിലെ പ്രൊഫസറാണ് ആല്ഫ്രഡ് അഹോ. സ്റ്റാന്ഫഡ് സര്വ്വകലാശാലയിലെ കമ്പ്യൂട്ടര് സയന്സ് വിഭാഗത്തില് പ്രൊഫസര് ഓഫ് എമിരറ്റ്സ് ആണ് ജെഫ്രി ഉള്മാന്.
അസോസിയേഷൻ ഫോർ കമ്പ്യൂട്ടിങ്ങ് മെഷീനറി എന്ന സംഘടന വർഷം തോറും കമ്പ്യൂട്ടർ രംഗത്തു പ്രവർത്തിക്കുന്ന പ്രതിഭകൾക്കു നൽകുന്ന പുരസ്കാരമാണ് എ, സി. എം. എ. എം. ടൂറിങ് അവാർഡ്. ഈ അവാർഡിനെ കമ്പ്യൂട്ടർ രംഗത്തു നിന്നുള്ള നോബൽ സമ്മാനം എന്നും വിശേഷിപ്പിച്ചു വരുന്നു.കമ്പ്യൂട്ടർ സയൻസ് രംഗത്തെ അത്യുന്നതമായ പുരസ്കാരമായി അംഗീകരിക്കപ്പെട്ടിട്ടുണ്ട്.മഞ്ചെസ്റ്റെർ യൂണിവേഴ്സിറ്റിയിലെ ഗണിതാദ്ധ്യാപകനും ഗണിതശാസ്ത്രജ്ഞനുമായിരുന്ന അലൻ ടൂറിങിന്റെ പേരിലുള്ള പുരസ്കാരമാണ് ഇത്.
ടൂറിങിനെ കൃത്രിമ ബുദ്ധി, തിയററ്റിക്കൽ കമ്പ്യൂട്ടർ സയൻസ് എന്നിവയുടെ പിതാവായി കരുതിവരുന്നു. 2007 മുതൽ ഇന്റെൽ, ഗൂഗിൾ ഇവയുടെ സഹായത്തോടെ 250000 ഡോളറാണ് അവാർഡ് തുക. കാർനെജീ മെല്ലൻ യൂണിവേഴ്സിറ്റിയിലെ അലൻ പെർളിസ് ആണ് ഈ അവാർഡിന്റെ ആദ്യ ജേതാവ്. ഐ.ബി.എം. കമ്പനിയിലെ ഫ്രാൻകിസ് അല്ലൻ ആണ് ആദ്യ വനിത പുരസ്കാരജേതാവ്, 2006ലാണ് ഈ പുരസ്കാരം നേടിയത്. ഇന്ത്യയിൽ നിന്നും രാജ് റെഡ്ഡിക്കു മാത്രമേ ഈ പുരസ്കാരം ലഭിച്ചിട്ടുള്ളൂ.