ദേശീയം
രാജ്യത്ത് കോവിഡ് ബാധിതരുടെ എണ്ണം 91 ലക്ഷവും കടന്നു; 24 മണിക്കൂറിനിടെ 44,059 പേര്ക്ക് കൂടി രോഗബാധ
രാജ്യത്തെ കോവിഡ് ബാധിതരുടെ എണ്ണം 91 ലക്ഷവും കടന്നു. 24 മണിക്കൂറിനിടെ 44,059 പേര്ക്ക് കൂടി രോഗം ബാധിച്ചു.
ഇതോടെ ആകെ രോഗബാധിതരുടെ എണ്ണം 91,39,866 ആയി. ഒരു ദിവസത്തിനിടെ 511 പേര് കൂടി കോവിഡ് ബാധിച്ച് മരിച്ചതോടെ ആകെ മരണം 1,33,738 ആയി.
ഇന്നലെ 41,024 പേര് രോഗമുക്തരായതോടെ രാജ്യത്തെ ആകെ രോഗമുക്തരുടെ എണ്ണം 85,62,641 ആയി. രോഗ മുക്തി നിരക്ക് 93.68 ശതമാനം. നിലവില് 4,43,486 പേരാണ് രാജ്യത്ത് ചികിത്സയിലുള്ളത്.
കോവിഡ് വ്യാപനം രൂക്ഷമായ ദില്ലിയില് 24 മണിക്കൂറിനിടെ 121 മരണവും 6,746 പുതിയ കേസുകളുമാണ് റിപ്പോര്ട്ട് ചെയ്തത്. ഈ മാസം ഇത് നാലാം തവണയാണ് മരണം 100 കടക്കുന്നത്.
അതിനിടെ പ്രതിരോധ പ്രവര്ത്തനങ്ങള് ശക്തമാക്കിയിട്ടുണ്ടെന്ന് ദില്ലി സര്ക്കാര് അറിയിച്ചു. മന്ത്രിമാരുടെ നേതൃത്വത്തില് റോഡുകള് തോറുമുള്ള ബോധവല്ക്കരണവും തുടരുകയാണ്.
മഹാരാഷ്ട്രയില് 5,753 പുതിയ കേസുകളും 50 മരണവുമാണ് 24 മണിക്കൂറില് സ്ഥിരീകരിച്ചത്.
കര്ണാടകയില് 1704 ഉം തമിഴ്നാട്ടില് 1655 ഉം ഗുജറാത്തില് 1495 ഉം ആണ് പ്രതിദിന വര്ധന.