കേരളം
ഇടുക്കിയില് കുത്തേറ്റ് മരിച്ച രേഷ്മ കൊവിഡ് പോസിറ്റീവ്; നടപടികള് വൈകുന്നു
ഇടുക്കി പള്ളിവാസലില് കുത്തേറ്റ് മരിച്ച പ്ലസ്ടു വിദ്യാര്ത്ഥിനി രേഷ്മ കൊവിഡ് പോസിറ്റീവായതിനെ തുടര്ന്ന് തുടര് നടപടികള് വൈകുന്നു.അതിനിടെ, സംഭവത്തിന് ശേഷം കാണാതായ രേഷ്മയുടെ ബന്ധു അനുവിനായി തെരച്ചില് പൊലീസ് ഊര്ജിതമാക്കി. സംഭവസ്ഥലത്തുനിന്ന് അനുവിന്റേതെന്ന് സംശയിക്കുന്ന മൊബൈല് ഫോണ് കണ്ടെടുത്തിരുന്നു. ഉളി പോലുള്ള ആയുധം ഉപയോഗിച്ചാണ് പെണ്കുട്ടിയെ കുത്തിക്കൊലപ്പെടുത്തിയതെന്നാണ് പ്രാഥമിക നിഗമനം.
രേഷ്മയെ അവസാനമായി കണ്ടത് അനുവിനൊപ്പമാണെന്ന് തെളിയിക്കുന്ന സിസിടിവി ദൃശ്യങ്ങളും പൊലീസിന് ലഭിച്ചു. രേഷ്മയുടെ പിതാവിന്റെ അര്ധസഹോദരന് അനുവുമായുള്ള രേഷ്മയുടെ സൗഹൃദത്തെച്ചൊല്ലി പെണ്കുട്ടിയുടെ വീട്ടില് പ്രശ്നങ്ങളുണ്ടായിരുന്നു. ഇതാവാം അനു രേഷ്മയെ കുത്തിക്കൊന്നതിന് കാരണമെന്നാണ് പൊലീസിന്റെ നിഗമനം.
ബൈസണ്വാലി ഹയര് സെക്കന്ഡറി സ്കൂള് പ്ലസ്ടു വിദ്യാര്ത്ഥിനിയായ രേഷ്മയെ വെള്ളിയാഴ്ച വൈകിട്ട് മുതലാണ് കാണാതായത്. സ്കൂള് സമയം കഴിഞ്ഞിട്ടും കുട്ടി വീട്ടില് തിരിച്ചെത്താത്തതിനെ തുടര്ന്ന് മാതാപിതാക്കള് നല്കിയ പരാതിയുടെ അടിസ്ഥാനത്തിലാണ് പള്ളിവാസല് പവര്ഹൗസിന് സമീപത്ത് നിന്ന് പെണ്കുട്ടിയുടെ മൃതദേഹം കണ്ടെത്തിയത്.