ഹൃദയവും കരളുമായി പോലീസിന്റെ വിമാനം, പറന്നത് തിരുവനന്തപുരത്ത് നിന്നത് കൊച്ചിയിലേക്ക്

തലസ്ഥാനത്തെ സ്വകാര്യ ആശുപത്രിയില്‍വച്ച്‌ മസ്തിഷ്‌ക മരണം സംഭവിച്ച വ്യക്തിയുടെ ഹൃദയവും കരളും വഹിച്ചുകൊണ്ട് കേരള പോലീസിന്റെ ഹെലിക്കോപ്റ്റര്‍ കൊച്ചിയിലേക്ക് തിരിച്ചു.

കൊച്ചിയിലെ രണ്ട് സ്വകാര്യ ആശുപത്രികളിലായി ചികിത്സയില്‍ കഴിയുന്ന രണ്ടുപേര്‍ക്കു വേണ്ടിയാണ് ഇവ കൊണ്ടുപോകുന്നത്. മസ്തിഷ്‌ക മരണം സംഭവിച്ച കന്യാകുമാരി സ്വദേശി അരവിന്ദിന്റേതാണ് ഹൃദയവും കരളും.

ലിസി ആശുപത്രിയിലേക്കാണ് ഹൃദയം കൊണ്ടുപോകുന്നത്. ആസ്റ്റര്‍ മെഡിസിറ്റിയില്‍ ചികിത്സയില്‍ കഴിയുന്ന രോഗിക്കുവേണ്ടിയാണ് കരള്‍ എത്തിക്കുന്നത്. തിരുവനന്തപുരത്തെ സ്വകാര്യ ആശുപത്രിയില്‍നിന്ന് പ്രത്യേക ആംബുലന്‍സിലാണ് അവയവങ്ങള്‍ വിമാനത്താവളത്തില്‍ എത്തിച്ചത്.

കേരള പോലീസിന്റെ ഹെലിക്കോപ്റ്റര്‍ ഉപയോഗിച്ചുള്ള ഇത്തരത്തിലുള്ള രണ്ടാമത്തെ ദൗത്യമാണിത്.