കേരളം
തെരഞ്ഞെടുപ്പ് പ്രവര്‍ത്തനങ്ങളിൽ ഏര്‍പ്പെട്ടവര്‍ ആർ. ടി. പി സി.ആർ ടെസ്റ്റ് നടത്തണമെന്ന് നിർദേശം
തെരഞ്ഞെടുപ്പ് പ്രവര്‍ത്തനങ്ങളിലും പ്രചാരണങ്ങളിലും സജീവമായി പങ്കെടുത്തവർ, അതുപോലെ ബൂത്തുകളില്‍ തെരഞ്ഞെടുപ്പ് ജോലികള്‍ക്ക് നിയോഗിക്കപ്പെട്ട രാഷ്ട്രീയ പാര്‍ട്ടി പ്രതിനിധികൾ എന്നിവർ ഉടൻ ടി. പി സി.ആർ ടെസ്റ്റ് നടത്തണമെന്ന് സംസ്ഥാനത്തെ അതാത് ജില്ലാകലക്ടര്‍മാരുടെ അറിയിപ്പിൽ പറഞ്ഞു.
തിരഞ്ഞെടുപ്പു പ്രചാരണത്തിൽ ഏർപ്പെട്ടവരിൽ ചുമയോ പനിയോ മറ്റു ശാരീരിക അസ്വസ്ഥതകളോ തോന്നുന്നവർ നിർബന്ധമായും രണ്ടുദിവസത്തിനകം ടെസ്റ്റ് നടത്തണം. മറ്റുള്ളവർ എത്രയും പെട്ടെന്ന് പരിശോധനയ്ക്കു വിധേയരാകണം. ടെസ്റ്റ് നെഗറ്റീവാണെങ്കിൽപ്പോലും രോഗലക്ഷണങ്ങളുള്ളവർ നിർബന്ധമായും സ്വയം സമ്പർക്കവിലക്കിൽ കഴിയണം.
തിരഞ്ഞെടുപ്പു ദിവസം പോളിങ് ബൂത്തുകളിൽ രാഷ്ട്രീയ കക്ഷികളുടെ ഏജന്റുമാരായി ഇരുന്നവരും രണ്ടുദിവസത്തിനകം RTPCR പരിശോധന നടത്തണമെന്നും അറിയിപ്പിലുണ്ട് രോഗവ്യാപനം തടയുന്നതിനായി ഇനിയുള്ള ദിവസങ്ങളിൽ കൂടുതൽ ജാഗ്രത പാലിക്കാൻ പൊതുജനങ്ങൾ തയ്യാറാകണം. മാസ്‌ക്, സാനിറ്റൈസർ, സാമൂഹിക അകലം എന്നീ ബ്രേക് ദ ചെയിൻ മാനദണ്ഡങ്ങൾ കർശനമായി പാലിക്കണം.
ആൾക്കൂട്ടമുണ്ടാകുന്ന സാഹചര്യങ്ങൾ പരമാവധി ഒഴിവാക്കണം. പ്രായമായവരും കുട്ടികളും അത്യാവശ്യ കാര്യങ്ങൾക്കുമാത്രം പുറത്തിറങ്ങണം തുടങ്ങിയ ഒട്ടേറെ നിർദേശങ്ങൾ സംസ്ഥാന ആരോഗ്യ വകുപ്പ് പത്രക്കുറിപ്പിൽ പറയുന്നു.ഇന്ത്യയിൽ കഴിഞ്ഞ ഒരാഴ്ചയായി കോവിഡ് വ്യാപനം ശക്തമായ വാർത്ത പുറത്ത് വന്നതിന് ശേഷം സംസ്ഥാന ആരോഗ്യവകുപ്പ് കൂടുതൽ ജാഗ്രതയിലാണ്.
