കേരളം
കേരളത്തിൽ 4,34,000 വ്യാജവോട്ടര്മാര്; ലിസ്റ്റ് പുറത്തുവിട്ട് ഓപ്പറേഷൻ ട്വിൻസ്
സംസ്ഥാനത്തെ നാലരലക്ഷത്തിലധികം വരുന്ന വ്യാജ വോട്ടർമാരുടെ ലിസ്റ്റ് പുറത്തുവിട്ട് രമേശ് ചെന്നിത്തല.
https://www.operationtwins.com/ എന്ന വെബ്സൈറ്റ് വഴിയാണ് ഒരോ നിയോജക മണ്ഡലത്തിലെയും വിശദവിവരങ്ങൾ പുറത്ത് വിട്ടിരിക്കുന്നത്.
തെരഞ്ഞെടുപ്പ് കമ്മീഷൻ്റെ 38000 ഇരട്ടവോട്ടെന്ന കണക്ക് തള്ളി കൊണ്ടാണ് നാലുലക്ഷത്തിലേറെ ഇരട്ടവോട്ടുകളുടെ വിവരങ്ങള് ചെന്നിത്തല പുറത്തുവിട്ടത്. കള്ളവോട്ടുകള്ക്കെതിരെ യുഡിഎഫ് ബൂത്ത്തല പ്രവര്ത്തകരുടെ സംരംഭം എന്ന ആമുഖത്തോടെയാണ് വെബ്സൈറ്റ് സജ്ജമാക്കിയിരിക്കുന്നത്.
വ്യാജ വോട്ടര്മാരെ കണ്ടെത്തുന്നതിന് തിരഞ്ഞെടുപ്പ് കമ്മീഷന് പരിശോധന നടത്താന് കഴിഞ്ഞിട്ടില്ല. കമ്മീഷന് ബി.എല്.ഒമാരോട് നോക്കാനാണ് പറഞ്ഞത്. ബി.എല്.ഒമാര്ക്ക് അതത് ബൂത്തിലെ ഇരട്ടിപ്പ് മാത്രമേ രേഖപ്പെടുത്താന് കഴിയൂ. പല ബൂത്തുകളില് ഒരേ ഫോട്ടോവച്ചുള്ള ഇരട്ടിപ്പ് കണ്ടെത്താന് ബി.എല്.ഒ മാര്ക്ക് കഴിയില്ല. അതുപോലെ പല മണ്ഡലങ്ങളിലായി പടര്ന്ന് കിടക്കുന്ന ഇരട്ടിപ്പുകളും ബി.എല്.ഒമാര്ക്ക് കണ്ടെത്താന് കഴിയില്ല.
വളരെ ദിവസങ്ങള് എടുത്ത് ഞാനും എന്റെ സഹപ്രവര്ത്തകരും കഠിനമായി പരിശ്രമിച്ചാണ് ഈ വ്യാജവോട്ടര്മാരെ കണ്ടെത്തിയത്. ഇപ്പോള് ഞങ്ങള് കണ്ടെത്തിയ 4,34,000 വ്യാജ വോട്ടർമാരേക്കാൾ കൂടുതല് വ്യാജ വോട്ടര്മാര് ഉണ്ടാവാം. ഈ കണ്ടെത്തല് തിരഞ്ഞെടുപ്പ് കമ്മീഷന് നേരത്തെ ചെയ്യേണ്ട കാര്യമായിരുന്നു.രമേശ് ചെന്നിത്തല വ്യക്തമാക്കുന്നു.