കേരളം
തെരുവുനായ്ക്കളെ പിടിക്കാന്‍ ഇനി കുടുംബശ്രീയും
തെരുവ്‌നായ്ക്കളെ അമര്‍ച്ച ചെയ്യാന്‍ തീവ്രയത്‌ന പരിപാടിയുടെ ഭാഗമായി നടപടികള്‍ വേഗത്തിലാക്കി. കുടുംബശ്രീ അംഗങ്ങള്‍ക്ക് നായ്ക്കളെ പിടിക്കാനുള്ള പരിശീലനം കൊടുത്തുകൊണ്ടാണിത്. കൊട്ടിയം മൃഗസംരക്ഷണ പരിശീലന കേന്ദ്രത്തില്‍ പരിശീലനം ഇന്നലെ ആരംഭിച്ചു.
ജില്ലയില്‍ ഒരുലക്ഷത്തോളം തെരുവ്‌നായ്ക്കളുണ്ടെന്നാണ് കണക്ക്. വീടുകളില്‍ വളര്‍ത്തുന്ന നായ്ക്കളുടെ എണ്ണത്തേക്കാള്‍ കൂടുതലാണിത്. ജനന നിയന്ത്രണ ശസ്ത്രക്രിയ തന്നെയാണ് നായ്‌പെരുപ്പം നിയന്ത്രിക്കാനുള്ള മാര്‍ഗം. വെറ്ററിനറി സര്‍ജന്‍മാരേയും കുടുംബശ്രീയില്‍ നിന്നും ഡോഗ് ഹാന്റ്‌ലര്‍മാരെയും നിയമിച്ചു കഴിഞ്ഞു.
ഒരു മാസം നീളുന്ന തീവ്രയത്‌ന പരിപാടിയിലൂടെ നായ്ശല്യം നിയന്ത്രിക്കാനാണ് പദ്ധതി. റസിഡന്റ്‌സ് അസോസിയേഷനുകളുടെ സഹകരണത്തോടെയാകും പദ്ധതി നടപ്പാക്കുക. കൊട്ടിയത്ത് പരിശീലനം കുടുംബശ്രീ സംസ്ഥാന മിഷന്‍ പ്രോഗ്രാം ഓഫീസര്‍ ഡോ.എ.സജീവ്കുമാര്‍ ഉദ്ഘാടനം ചെയ്തു.
പരിശീലന കേന്ദ്രം അസി.ഡയറക്ടര്‍ ഡോ.ഡി. ഷൈന്‍കുമാര്‍, ആദിച്ചനല്ലൂര്‍ പഞ്ചായത്തംഗം രേഖ എസ്.ചന്ദ്രന്‍, ജില്ലാമിഷന്‍ കോഡിനേറ്റര്‍ എ.ജി.സന്തോഷ്, പ്രോഗ്രാം ഓഫീസര്‍മാരായ ശ്യാം.ജിനായര്‍, രതീഷ് ഡോ. കെ.എസ്.സിന്ധു എന്നിവര്‍ സംബന്ധിച്ചു.
