പ്രാദേശിക പത്രപ്രവർത്തകർക്ക് കൈത്താങ്ങ്; മന്ത്രി വി എൻ വാസവന് നിവേദനം നൽകി കേരള പത്രപ്രവർത്തക അസോസിയേഷൻ

പ്രാദേശിക പത്രപ്രവർത്തകർക്ക് ക്ഷേമനിധി ഏർപ്പെടുത്തുക, ജില്ലാതല അക്രഡിറ്റേഷൻ ലഭ്യമാക്കുക, പ്രാദേശിക പത്ര പ്രവർത്തകരുടെ കണക്കെടുപ്പ് പൂർത്തിയാക്കുക, ആരോഗ്യ സുരക്ഷാ പദ്ധതിയും, 25 ലക്ഷം രൂപയുടെ ഇൻഷുറൻസും ഏർപ്പെടുത്തുക, ഇവരുടെ പ്രശ്നങ്ങൾ പഠിക്കാൻ കമ്മീഷനെ നിയമിക്കുക, തുടങ്ങിയ ആവശ്യങ്ങളുന്നയിച്ച് അസോസിയേഷന്റെ നിവേദനം സഹകരണ രജിസ്ട്രേഷൻ വകുപ്പ് മന്ത്രി വി. എൻ.വാസവാന് കൈമാറി.

അസോസിയേഷൻ അംഗവും ഇടത് പക്ഷ വക്താവുമായ റെജി ലൂക്കോസിന്റെ സാന്നിധ്യത്തിൽ സംസ്ഥാന കമ്മിറ്റി അംഗങ്ങളായ രാജേഷ് കുര്യനാട് , ബൈലോൺ എബ്രഹാം, കോട്ടയം ജില്ലാ കമ്മിറ്റിയംഗങ്ങളായ അരുൺ തങ്കപ്പൻ, അജേഷ് ജോൺ, ജോജി കടപ്പൂർ എന്നിവരും ചേർന്നാണ് നിവേദനം മന്ത്രിക്ക് കൈമാറിയത്.

അസോസിയേഷൻ ഉന്നയിച്ച പ്രാദേശിക മാധ്യമ പ്രവർത്തകരുടെ പ്രശ്നങ്ങൾ മുഖ്യമന്ത്രി പിണറായി വിജയന്റെ അടിയന്തര ശ്രദ്ധയിൽപ്പെടുത്തുമെന്ന് മന്ത്രി വി.എൻ.വാസവൻ ഭാരവാഹികൾക്ക് ഉറപ്പ് നൽകി. ചാനൽ ചർച്ചകളിലെ ഇടത് വക്താവും, കേരള പത്ര പ്രവർത്തക അസോസിയേഷൻ ആദ്യകാല അംഗവുമായ റെജി ലുക്കോസ് ഈ വിഷയം സംബന്ധിച്ച് മുഖ്യമന്ത്രിയുടെയും, മന്ത്രിമാരുടെയും ശ്രദ്ധയിൽ കൊണ്ടുവന്ന് പ്രാദേശിക പത്ര പ്രവർത്തകരുടെ പ്രശ്ന പരിഹാരത്തിന് എന്നും കൂടെ ഉണ്ടാകുമെന്നും ഉറപ്പ് നൽകി.