കേരളം
സംസ്ഥാനത്ത് വീണ്ടും മഴ മുന്നറിയിപ്പ്; ഇന്ന് എട്ടു ജില്ലകളില് യെല്ലോ അലര്ട്ട്
രണ്ടു ദിവസത്തെ ഇടവേളയ്ക്കു ശേഷം സംസ്ഥാനത്ത് വീണ്ടും മഴ കനക്കുമെന്ന് മുന്നറിയിപ്പ്. ഇന്നു തിരുവനന്തപുരം മുതല് ഇടുക്കി വരെയും പാലക്കാട്ടും യെല്ലോ അലര്ട്ട് പ്രഖ്യാപിച്ചു. നാളെയും മറ്റന്നാളും തീവ്ര മഴ പെയ്യുമെന്നാണ് മുന്നറിയിപ്പ്. നാളെ തിരുവനന്തപുരം, പത്തനംതിട്ട, കോട്ടയം, എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളില് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. കൊല്ലം, ആലപ്പുഴ, കാസര്ക്കോട് ജില്ലകളില് യെല്ലോ അലര്ട്ടും പ്രഖ്യാപിച്ചു.
മറ്റന്നാള് തിരുവനന്തപുരം മുതല് വയനാട് വരെയുള്ള ജില്ലകളില് ഓറഞ്ച് അലര്ട്ടാണ്. കണ്ണൂര്, കാസര്ക്കോട് ജി്ല്ലകളില് യെല്ലോ അലര്ട്ടും പ്രഖ്യാപിച്ചു. വെള്ളിയാഴ്ച കാസര്ക്കോട് ഒഴികെ എല്ലാ ജില്ലയിലും ജാഗ്രതാ നിര്ദേശം പുറപ്പെടുവിച്ചിട്ടുണ്ട്. വരും ദിവസങ്ങളില് ശക്തമായ മഴ ഉണ്ടാകുമെന്ന പ്രവചനങ്ങളുടെ അടിസ്ഥാനത്തില് കേരള, കണ്ണൂര് സര്വകലാശാല പരീക്ഷകള് മാറ്റി.
ശനിയാഴ്ച വരെ നടക്കാനിരുന്ന സര്വകലാശാല പരീക്ഷകളാണ് മാറ്റിയത്. പുതുക്കിയ തീയതി പിന്നീട് അറിയിക്കും. കഴിഞ്ഞദിവസം സാങ്കേതിക സര്വകലാശാലയും പരീക്ഷകള് മാറ്റിയിരുന്നു.ബുധനാഴ്ചയും വെള്ളിയാഴ്ചയും നടത്താനിരുന്ന ബിടെക് രണ്ടാം സെമസ്റ്റര് പരീക്ഷകളാണ് സാങ്കേതിക സര്വകലാശാല മാറ്റിവെച്ചത്. പുതുക്കിയ തീയതി പിന്നീട് അറിയിക്കും. മഴയുടെ പശ്ചാത്തലത്തില് പിഎസ്സിയും പരീക്ഷകള് മാറ്റിവെച്ചിട്ടുണ്ട്.