കേരളം
ബാലരാമപുരം കൈത്തറി പ്രദർശന വിപണമേള 28 ന് ആരംഭിക്കും; കേന്ദ്ര സഹമന്ത്രി വി. മുരളീധരൻ ഉദ്ഘാടനം ചെയ്യും
തിരുവനന്തപുരം; കൊവിഡ് പ്രതിസന്ധികാരണം ദുരിതത്തിലായ ബാലരാമപുരത്തെ കൈത്തറി സംരംഭകരെ സഹായിക്കാനായി ഈ മാസം 28 മുതൽ മാർച്ച് 3 വരെ വഴുതക്കാട് ട്രിവാൻഡ്രം ക്ലബിൽ ബാലരാമപുരം കൈത്തറി പ്രദർശന വിപണന മേള നടത്തുന്നു. നബാർഡിന്റെ സഹകരണത്തോടെ സെന്റർ ഫോർ ഇന്നവേഷൻ ഇൻ സയൻസ് ആൻഡ് സോഷ്യൽ ആക്ഷൻ ( സിസ്സ)നാണ് പ്രദർശന വിപണന മേള സംഘടിപ്പിക്കുന്നത്.
ബാലരാമപുരം കൈത്തറി ഉൽപ്പന്നങ്ങളുടെ 80 % വിപണി ഓണക്കാലവും, അത് പോലെ സ്കൂൾ യൂണിഫോമിലെ വിൽപ്പനയുമാണ്. എല്ലാവർഷവും, ഓണക്കച്ചവടത്തിന് വേണ്ടിയും , സ്കൂൾ യൂണിഫോമുകൾ നൽകുന്നതിന് വേണ്ടിയും ഫെബ്രുവരി മാസത്തിൽ തന്നെ കച്ചവടക്കാർ തയ്യാറായിരിക്കും, എന്നാൽ കഴിഞ്ഞ വർഷം കൊവിഡ് കാരണം അതീവ പ്രതിസന്ധിയിലായവരെ സഹായിക്കുന്നതിന് വേണ്ടിയാണ് സിസ്സയുടെ നേതൃത്വത്തിൽ ഇത്തരത്തിലൊരു പരിപാടി സംഘടിപ്പിക്കുന്നത്. ഇടനിലക്കാരില്ലാതെ കുറഞ്ഞ വിലയിൽ നെയ്ത്തുകാരിൽ നിന്നും നേരിട്ട് ഉൽപ്പന്നങ്ങൾ വാങ്ങാനുള്ള സൗകര്യമാണ് ഇവിടെയുള്ളത്.
കൊവിഡ് സമയത്ത് വിപണനം ഇല്ലാതിരുന്നിട്ടും ഉൽപ്പാദനം നിർത്തിവെയ്ക്കാൻ നെയ്ത്തുകാർ തയ്യാറായിട്ടില്ല. അതിനാൽ അവരെ കൂടുതൽ പ്രതിസന്ധിയിലാക്കാതിരിക്കാനാണ് ഇത്തരത്തിലുള്ള മേളകൾ സംഘടിപ്പിക്കുന്നതെന്ന് സിസ്സ ഡയറക്ടർ ( അഡ്മിൻ)അഡ്വ. സുരേഷ് കുമാർ. എസ്. അറിയിച്ചു. തലസ്ഥാനത്തെ പ്രമുഖ ക്ലബുകളുടേയും, സംഘടനകളുടേയും സഹകരണത്തോടെയാണ് മേള സംഘടിപ്പിക്കുന്നത്. .
28 ന് രാവിലെ 11.30 തിന് ആരംഭിക്കുന്ന വിപണനമേള കേന്ദ്ര സഹമന്ത്രി വി. മുരളീധരൻ ഉദ്ഘാടനം ചെയ്യും. നബാർഡ് സിജിഎം ഡോ. പി. ശെൽവരാജ് അധ്യക്ഷത വഹിക്കും, സിനിമാ താരം വിന്ദുജ മേനോൻ ആദ്യ വിൽപ്പന നിർവ്വഹിക്കും.