ദേശീയം
ജനാധിപത്യ മൂല്യങ്ങളുടെ ലംഘനം; മാധ്യമപ്രവര്‍ത്തകര്‍ക്കെതിരെ കേസെടുത്തതില്‍ എഡിറ്റേര്‍സ് ഗില്‍ഡ് ഓഫ് ഇന്ത്യ
റിപബ്ലിക് ദിനത്തിലെ ട്രാക്ടര്‍ റാലിയുമായി ബന്ധപ്പെട്ട് രാജ്ദീപ് സര്‍ദേശായി ഉള്‍പ്പെടെ ആറു മാധ്യമപ്രവര്‍ത്തകര്‍ക്കെതിരെ രാജ്യദ്രോഹക്കുറ്റം ചുമത്തി കേസെടുത്തതില്‍ അപലപിച്ച്‌ എഡിറ്റേര്‍സ് ഗില്‍ഡ് ഓഫ് ഇന്ത്യ. ഉത്തര്‍പ്രദേശ്, മധ്യപ്രദേശ് സംസ്ഥാനങ്ങളിലെ പൊലീസാണ് കേസെടുത്തത്.
രാജ്ദീപ് സര്‍ദേശായി, വിനോദ് ജോസ്, സഫര്‍ ആഖ, പരേഷ് നാഥ്, ആനന്ദ് നാഥ് എന്നീ മാധ്യമപ്രവര്‍ത്തകര്‍ക്കെതിരെയും ശശി തരൂര്‍ എം.പിക്കെതിരെയുമാണ് കേസ്. രാജ്യദ്രോഹം, മതവികാരം വ്രണപ്പെടുത്തല്‍, സമാധന ലംഘനം തുടങ്ങിയ വകുപ്പുകള്‍ ചുമത്തിയാണ് കേസ്.
കര്‍ഷക പ്രക്ഷോഭവുമായി ബന്ധപ്പെട്ട് ജനുവരി 26ന് നടന്ന അക്രമ സംഭവങ്ങള്‍ റിപ്പോര്‍ട്ട് ചെയ്ത മാധ്യമപ്രവര്‍ത്തകര്‍ക്കെതിരെ രാജ്യദ്രോഹക്കുറ്റം ചുമത്തി യു.പി, മധ്യപ്രദേശ് പൊലീസ് കേസെടുത്തതിനെ അപലപിക്കുന്നു.
മനപൂര്‍വം വിദ്വേഷം ഉണ്ടാക്കാന്‍ ശ്രമിച്ചുവെന്ന വാദം തെറ്റാണ്. മാധ്യമപ്രവര്‍ത്തകരെ ഉദ്ദേശിച്ചുള്ള ഈ നീക്കം രാജ്യത്തിന്‍റെ ജനാധിപത്യ മൂല്യങ്ങളുടെ ലംഘനമാണെന്നും മാധ്യമങ്ങള്‍ക്ക് തടയിടാനുള്ള നീക്കമാണെന്നും പ്രസിഡന്‍റ് സീമ മുസ്തഫ, സെക്രട്ടറി സജ്ഞയ് കപൂര്‍, ജനറല്‍ സെക്രട്ടറി എന്നിവര്‍ ചേര്‍ന്ന് പുറത്തിറക്കിയ പ്രസ്താവനയില്‍ പറയുന്നു.
മാധ്യമപ്രവര്‍ത്തകര്‍ക്കെതിരായ എഫ്.ഐ.ആര്‍ ഉടന്‍ പിന്‍വലിക്കണം. മാധ്യമങ്ങളെ ഭയമില്ലാതെ സ്വതന്ത്രമായി റിപ്പോര്‍ട്ട് ചെയ്യാന്‍ അനുവദിക്കണമെന്നും എഡിറ്റേര്‍സ് ഗില്‍ഡ് ആവശ്യപ്പെട്ടു.
