ഇന്ന് ഭരണഘടനാ ദിനം

നവംബര്‍ 26 ഇന്ത്യന്‍ ഭരണഘടനയുടെ നിര്‍ണായക ദിനവും ജനാധിപത്യത്തിന്റെ നട്ടെല്ലുമാണ്. ജനങ്ങള്‍ക്ക് തുല്യ നീതി നല്‍കുന്നതാണ് ഇന്ത്യന്‍ ഭരണഘടന.

സ്വതന്ത്ര ഇന്ത്യയുടെ ചരിത്രത്തിലെ നിര്‍ണായക ദിവസങ്ങളില്‍ ഒന്നാണ് നവംബര്‍ 26. ഇന്ത്യന്‍ ഭരണഘടന അംഗീകരിക്കപ്പെട്ട ദിവസമാണിത്. നാല് വര്‍ഷത്തെ ഇടവേളയ്ക്ക് ശേഷം 1950 ജുവരി 26നാണ് ഇന്ത്യന്‍ ഭരണഘടന നിലവില്‍ വന്നത്.

ഈ ദിവസം രാജ്യം രണ്ട് വ്യക്തികളോട് ആദരം അര്‍പ്പിക്കുന്നുണ്ട്. ഭരണഘടന ഡ്രാഫ്റ്റിങ് കമ്മിറ്റി ചെയര്‍മാനായിരുന്ന ഡോ. ബിആര്‍ അംബേദ്കറോടും കോണ്‍സ്റ്റിറ്റിയൂട്ട് അസംബ്ലിയില്‍ അംഗങ്ങളായിരുന്ന 207 അംഗങ്ങള്‍ക്കുമാണ് ആദരം നല്‍കുന്നത്.

ഇന്ത്യന്‍ ജനാധിപത്യത്തിന്റെ നട്ടെല്ല് കൂടിയാണ് നവംബര്‍ 26. ഇന്ത്യന്‍ ഭരണഘടന അംഗീകരിച്ചതിന്റെ 70താം വാര്‍ഷികം കൂടിയാണ് 2019ലെ ഈ ദിവസം.

അതിനാല്‍ തന്നെ രാജ്യത്തിന്റെ വിവിധ ഭാഗങ്ങളില്‍ വ്യത്യസ്തമായ രീതിയില്‍ ആഘോഷങ്ങള്‍ നടത്തപ്പെടുകയും ചെയ്യും. 2015ലാണ് നവംബര്‍ 26നെ ഭരണഘടന ദിനമായി പ്രഖ്യാപിച്ചത്.

ദേശീയ നിയമ ദിനം എന്നും ഈ ദിവസം അറിയപ്പെടുന്നുണ്ട്. ബ്രിട്ടീഷ് ഭരണകാലത്തെ നീണ്ട നാളത്തെ ശ്രമത്തിന്റെ ഫലമായിട്ടാണ് ഇങ്ങനെയൊരു ദിവസം ഇന്ത്യക്ക് ലഭിച്ചത്.

ഡോ. സച്ചിദാനന്ദ സിന്‍ഹയുടെ നേതൃത്വത്തില്‍ 1946 ഡിസംബര്‍ 9ന് ഭരണഘടന അസംബ്ലി ആദ്യമായി യോഗം ചേര്‍ന്നു. ഈ യോഗം വിജയം കണ്ടതോടെ 1947 ഓഗസ്റ്റ് 26ന് ഡോ. ബിആര്‍ അംബേദ്കറുമായി ചേര്‍ന്ന് ഒരു കരട് സമിതി രൂപീകരിക്കാന്‍ തീരുമാനമായി.

1949 നവംബര്‍ 26ന് അംബേദ്കറുടെ നേതൃത്വത്തിലുള്ള പ്രവര്‍ത്തനങ്ങള്‍ പൂര്‍ത്തിയായി. തുടര്‍ന്ന് 1950 ജനുവരി 26ന് ഇന്ത്യന്‍ ഭരണഘടന പ്രാബല്യത്തില്‍ വരുകയും ചെയ്തു.

ഇന്ത്യന്‍ ഭരണഘടന ജാതി മത ഭേദമില്ലാതെ രാജ്യത്തെ ജനങ്ങള്‍ക്ക് തുല്യ നീതി നല്‍കുന്നുണ്ട്. പൗരന്റെ നീതി, സമത്വം, സ്വാതന്ത്ര്യം എന്നിവ ഉറപ്പാക്കാനും ഇതിലൂടെ സാധിച്ചു.

സാഹോദര്യത്തെ ഉയര്‍ത്തിപ്പിടിക്കുന്ന നിലപാടാണ് ഭരണഘടന പിന്തുടരുന്നത്. ഇന്ത്യന്‍ ഭരണഘടന സ്ഥാപിതമായതോടെ രാജ്യത്തെ ഒരു പരമാധികാര, സോഷ്യലിസ്റ്റ്, മതേതര, ജനാധിപത്യ റിപ്പബ്ലിക്കായി പ്രഖ്യാപിക്കുകയും ചെയ്തു.