ക്രൈം
തൃശൂരില് സുഹൃത്തിന്റെ കുത്തേറ്റ വനിതാ ദന്ത ഡോക്ടര് മരിച്ചു
ക്ലൈമാക്സില് സുഹൃത്തു വില്ലനായപ്പോള് വനിതാ ഡോക്ടര്ക്ക് നഷ്ടമായത് സ്വന്തം ജീവന്. രണ്ടുവര്ഷം മുന്പാണ് മുവാറ്റുപുഴയില് നിന്നും കുട്ടനല്ലൂരിലെത്തിയ ഡോ: സോന ‘ദ ഡെന്റിസ്റ്റ്’ എന്ന പേരിലാണ് സ്വന്തമായി ദന്തല് ക്ലിനിക് തുടങ്ങിയത്. പാവറട്ടി സ്വദേശിയായ സുഹൃത്ത് മഹേഷുമായി ചേര്ന്നായിരുന്നു ക്ലിനിക്കിന്റെ ആരംഭം. കെട്ടിട നിര്മാണരംഗത്ത് പ്രവര്ത്തിച്ചിരുന്ന മഹേഷിന് അടുത്ത കാലത്തായി സാമ്പത്തിക പ്രശ്നങ്ങളുണ്ടായിരുന്നു. ഇതോടെ ആശുപത്രിയിലെ വരുമാനം പൂര്ണമായും കൈക്കലാക്കാന് തുടങ്ങിയതു തര്ക്കത്തിനിടയാക്കി.
ഇരുവരും അത്യാഡംബര ജീവിതമാണ് നയിച്ചിരുന്നതെന്നു പറയുന്നു. ആക്രമണത്തില് വയറിലും തുടയിലും ഗുരുതര പരുക്കേറ്റ സോന തൃശൂരിലെ സ്വകാര്യ ആശുപത്രിയില് ചികിത്സയിലിരിക്കെ ഞായറാഴ്ച രാവിലെയാണ് മരിച്ചത്. വയറിലും അടിവയറ്റിലും രണ്ടു കുത്തുകളാണ് ഉണ്ടായിരുന്നത്. ശസ്ത്രക്രിയ നടത്തേണ്ടി വന്നെങ്കിലും രക്തസ്രാവം നിയന്ത്രിക്കാന് കഴിഞ്ഞില്ല. അങ്ങനെയാണ് മരണം സംഭവിച്ചത്. അവിവാഹിതനായ മഹേഷുമായി കുരിയച്ചിറയില് ഫ്ലാറ്റ് വാടകക്കെടുത്തു താമസിക്കുകയായിരുന്നു സോന. ഇതിന്റെ ഉടമസ്ഥാവകാശം സംബന്ധിച്ചും പ്രശ്നമുണ്ടായിരുന്നതായാണ് സൂചന.
മഹേഷ് ഭീഷണിപ്പെടുത്തുന്നതായി കാണിച്ച് കഴിഞ്ഞ 25ന് തൃശൂര് സിറ്റി പോലീസിനു സോന പരാതി നല്കിയിരുന്നു. ഇത് ഒല്ലൂര് സി.ഐക്കു തുടര് നടപടികള്ക്കായി കൈമാറി. സിറ്റി പോലീസ് കമ്മിഷണര്ക്ക് സോന നല്കിയ പരാതിയില് ബ്ലാക്ക് മെയിലിങ്, ഭീഷണി എന്നിവയിലൂടെ പണം തട്ടാന് ശ്രമിക്കുന്നതായാണ് പരാതി. ഇതനുസരിച്ച് ഒല്ലൂര് സിഐ ഫോണില് മഹേഷിനെ വിളിച്ചെങ്കിലും സ്ഥലത്തില്ലെന്ന കാരണം പറഞ്ഞു ഒഴിഞ്ഞു മാറി.
സോനയുമായി മഹേഷ് നേരിട്ട് സംസാരിക്കാമെന്നറിയിച്ചതനുസരിച്ചാണ് ക്ലിനിക്കില് ബന്ധുക്കളോടൊപ്പം എത്തിയത്. മഹേഷിനൊപ്പവും ഏതാനും സുഹൃത്തുക്കളുണ്ടായിരുന്നു. സംസാരം തര്ക്കത്തിലെത്തിയതിനിടെയാണ് മഹേഷ് കുത്തിയത്. മഹേഷ് ഡോക്ടറുമായി അടുത്ത സൗഹൃദത്തിലായിരുന്നു. എന്നാല് ആശുപത്രിയില് നിന്നുള്ള ലാഭം സ്വന്തം ഇഷ്ടത്തിനു എടുക്കുന്നതു തര്ക്കത്തിനിടയാക്കി. പലവട്ടം സോനയുടെ ബന്ധുക്കളുടെ സാന്നിധ്യത്തില് ചര്ച്ച നടത്തി.
ഇന്റീരിയര് ഡെക്കറേഷനു തുക ചെലവിടുന്നതുമായി ബന്ധപ്പെട്ടു രൂക്ഷ തര്ക്കമുണ്ടായിരുന്നുവെന്നു ബന്ധുക്കള് മൊഴി നല്കി. സോന പോലീസില് പരാതി നല്കിയതാണ് മഹേഷിനെ കുപിതനാക്കിയതെന്നു പറയുന്നു. ഭര്ത്താവുമായി വേര്പിരിഞ്ഞു താമസിക്കുന്ന സോനയും മഹേഷുമായി സാമ്പത്തിക തര്ക്കം മുറുകിയതോടെയാണ് പരാതിയിലെത്തിയത്.
മഹേഷ് ആസൂത്രിതമായാണ് അക്രമത്തിനു എത്തിയതെന്നു പോലീസ് പറഞ്ഞു. കാര് കസ്റ്റഡിയിലെടുത്തു. ഇയാളുടെ നീക്കം സംബന്ധിച്ചു പോലീസിനു വിവരം ലഭിച്ചു. ഫോണ് സ്വിച്ച്ഡ് ഓഫാണ്. ആക്രമണത്തിന് ശേഷം രക്ഷപ്പെട്ട മഹേഷ് കാര് ബന്ധു വീട്ടില് ഉപേക്ഷിച്ചു മുങ്ങുകയായിരുന്നു. സോനയുടെ മൃതദേഹം പോസ്റ്റ്മോര്ട്ടത്തിനു ശേഷം ബന്ധുക്കള്ക്ക് കൈമാറി. സംസകാരം നാളെ മുവാറ്റുപുഴയില്.