ആരോഗ്യം
ബ്രസീലിൽ ഒരുദിനം ആയിരത്തിലേറെ കൊവിഡ് മരണങ്ങൾ; മെക്സിക്കോയിൽ ഇന്നലെ മരിച്ചത് 947 പേർ.
വാഷിങ്ടൺ: ലോകരാജ്യങ്ങളിൽ കൊവിഡ് മരണങ്ങളിൽ വൻ വർധനവ് തുടരുന്നു. ബ്രസീലിലെയും മെക്സിക്കോയിലെയും കണക്കുകൾ ലോകരാജ്യങ്ങളിൽ ആശങ്കയുണർത്തുന്നതാണ്. കഴിഞ്ഞദിവസവും ഇരുരാജ്യങ്ങളിലും ആയിരത്തോളം കൊവിഡ് മരണങ്ങളാണ് റിപ്പോർട്ട് ചെയ്തതെന്നാണ് മീറ്ററിന്റെ കണക്കുകൾ വ്യക്തമാക്കുന്നത്. ദക്ഷിണാഫ്രിക്കയിലും രോഗബാധിതരുടെ എണ്ണത്തിൽ വൻ വർധനവാണ് ഉണ്ടായിരിക്കുന്നത്. ലോകത്താകെ 9,525,937 കൊവിഡ് കേസുകളാണ് ജൂൺ 25 വ്യാഴാഴ്ഴ്ച രാവിലെ വരെ റിപ്പോർട്ട് ചെയ്തിരിക്കുന്നത്. രോഗബാധിതരിലും മരണസംഖ്യയിലും ഒന്നാമത് അമേരിക്കയാണ്. രണ്ടാമത് ബ്രസീലും. രോഗബാധിതരുടെ എണ്ണത്തിൽ ആഗോളതലത്തിൽ ഇന്ത്യ നാലാമത് തുടരുകയാണ്.
ലോകരാജ്യങ്ങളിൽ കൊവിഡ് ബാധിച്ച് ഇതുവരെ 484,925 പേർക്കാണ് ജീവൻ നഷ്ടമായത്. ഇതിൽ 124281 മരണങ്ങളും റിപ്പോർട്ട് ചെയ്തിരിക്കുന്നത് അമേരിക്കയിൽ നിന്നാണ്. മരണസംഖ്യയിൽ രണ്ടാമത് നിൽക്കുന്ന ബ്രസീലിൽ മരണസംഖ്യ 53,000 കടന്നു. നിലവിൽ 53, 874 പേരാണ് ബ്രസീലിൽ മരിച്ചതെന്നാണ് റിപ്പോർട്ടുകൾ വ്യക്തമാകുന്നത്. രോഗബാധിതരുടെ എണ്ണത്തിൽ അഞ്ചാമതാണെങ്കിലും മരണസംഖ്യയിൽ മൂന്നാമത് നിൽക്കുന്നത് യുകെയാണ്. ഇവിടെ 43,081 പേരാണ് ഇതുവരെ ഇവിടെ മരണപ്പെട്ടത്.