ഹൈറിച്ച് കേസിൽ ഉടമകളെ ബന്ധപ്പെടാനാകുന്നില്ലെന്ന് അഭിഭാഷകൻ; കേസ് വീണ്ടും 12ന്

സാമ്പത്തിക തട്ടിപ്പ്​ കേസ് എന്ന് ഇ ഡി ആരോപിക്കുന്ന കേസിൽ ഒളിവിൽപോയ ‘ഹൈറിച്ച്​ ഓൺലൈൻ ഷോപ്പി’ ഉടമകളെ ബന്ധപ്പെടാനാകുന്നില്ലെന്ന് പ്രതിഭാഗം അഭിഭാഷകൻ. കലൂരിലെ ​പ്രത്യേക പി.എം.എൽ.എ കോടതിയിൽ പ്രതികളുടെ മുൻകൂർ ജാമ്യാപേക്ഷ പരിഗണിക്കവേയാണ് അഭിഭാഷകൻ ഇക്കാര്യം അറിയിച്ചത്. അതേസമയം, കേസിൽ ഇ.ഡിക്ക് അന്വേഷണവുമായി മുന്നോട്ടുപോകാമെന്ന് കോടതി വ്യക്തമാക്കി.

ഹൈറിച്ച് ഓൺലൈൻ ഷോപ്പി മാനേജിങ് ഡയറക്ടർ കോലാട്ട് കെ.ഡി. പ്രതാപൻ, ഭാര്യയും സി.ഇ.ഒയുമായ കാട്ടൂക്കാരൻ ശ്രീന എന്നിവരാണ് കേസിനെ തുടർന്ന് ഒളിവിൽ കഴിയുന്നത്. പ്രതികൾ ആദ്യം അന്വേഷണ ഉദ്യോഗസ്ഥർ മുമ്പാകെ ഹാജരാകുകയാണ്​ വേണ്ടതെന്നും അന്വേഷണവുമായി സഹകരിക്കണമെന്നും കോടതി കഴിഞ്ഞ തവണ ചൂണ്ടിക്കാട്ടിയിരുന്നു.

അന്വേഷണ ഉദ്യോഗസ്ഥർ മുമ്പാകെ എന്ന്​ ഹാജരാകാൻ കഴിയുമെന്നും കോടതി ചോദിച്ചിരുന്നു. തുടർന്നാണ് നിലവിൽ പ്രതികളെ ബന്ധപ്പെടാനാകുന്നില്ലെന്ന് അഭിഭാഷകൻ അറിയിച്ചത്. അന്വേഷണ സംഘത്തിന് മുന്നിൽ ഹാജരായാൽ അറസ്റ്റ് ഉണ്ടാകുമോ എന്ന് പ്രതിഭാഗം വക്കീലിന്റെ ചോദ്യത്തിന്, പ്രതികൾ കീഴടങ്ങിയാൽ അറസ്​റ്റ്​ ചെയ്യില്ലെന്ന്​ ഇപ്പോൾ ഉറപ്പ്​ നൽകാൻ കഴിയില്ലെന്നാണ് ഇ.ഡി നിലപാട്.

കേരളത്തിന് അകത്തും പുറത്തും വലിയ തോതിൽ തട്ടിപ്പ് നടന്നതായും മുൻകൂർ ജാമ്യം അനുവദിക്കരുതെന്നും എന്നാണ് ഇ.ഡി കോടതിയെ അറിയിച്ചത്. എല്ലാ കാര്യങ്ങളും നിയമപരമായി തന്നെയാണ് ചെയ്തിട്ടുള്ളതെന്നും ഒരു മുൻ എം.എൽ.എയുടെ നേതൃത്വത്തിൽ രാഷ്ട്രീയപ്രേരിതമായ ആരോപണവും മറ്റു ചിലരുടെ വ്യക്തി താൽപര്യങ്ങൾക്കും വേണ്ടിയാണ് ഈ കേസ് എന്നാണ് പ്രതിഭാഗം ആരോപിക്കുന്നത്. ഈ മാസം 12 ആം തീയതി മുൻകൂർ ജാമ്യ അപേക്ഷ ഉൾപ്പെടെയുള്ള കേസുകൾ കോടതി വീണ്ടും പരിഗണിക്കും.