ദേശീയം
കൊവിഡ് ബാധിച്ച് മരിച്ചവരുടെ കുടുംബങ്ങള്ക്ക് നഷ്ടപരിഹാരം നല്കാനാവില്ല; സുപ്രീംകോടതിയെ അറിയിച്ച് കേന്ദ്രസര്ക്കാര്
കൊവിഡ് ബാധിച്ച് മരിച്ചവരുടെ കുടുംബങ്ങള്ക്ക് നഷ്ടപരിഹാരം നല്കാന് സാധിക്കില്ലെന്ന് കേന്ദ്രസര്ക്കാര് സുപ്രീംകോടതിയെ അറിയിച്ചു. ദുരന്തനിവാരണ നിയമപ്രകാരം പ്രകൃതി ദുരന്തങ്ങള്ക്ക് മാത്രമേ നഷ്ടപരിഹാരം നല്കാന് സാധിക്കുകയുള്ളൂ. കുടുംബങ്ങള്ക്ക് നാലുലക്ഷം രൂപ വീതം നല്കുന്നതിനുള്ള സാമ്പത്തിക സ്ഥിതി സംസ്ഥാനങ്ങള്ക്കില്ലെന്നും കേന്ദ്രസര്ക്കാര് സുപ്രീംകോടതിയില് സമര്പ്പിച്ച സത്യവാങ്മൂലത്തില് പറയുന്നു.കൊവിഡ് ബാധിച്ച് മരിച്ചവരുടെ കുടുംബാംഗങ്ങള്ക്ക് നാലുലക്ഷം രൂപ വീതം നഷ്ടപരിഹാരം നല്കണമെന്ന ഹര്ജി സുപ്രീംകോടതിയുടെ പരിഗണനയിലാണ്.
കൊവിഡ് നഷ്ടപരിഹാരം നല്കുന്നത് സംബന്ധിച്ച് നിലപാട് വ്യക്തമാക്കാന് സുപ്രീംകോടതി കേന്ദ്രത്തോട് ആവശ്യപ്പെട്ടിരുന്നു. ഈ പശ്ചാത്തലത്തിലാണ് 183 പേജുള്ള സത്യവാങ്മൂലം കേന്ദ്രസര്ക്കാര് സുപ്രീംകോടതിയില് സമര്പ്പിച്ചത്. കോവിഡ് ബാധിച്ച് മരിച്ചവരുടെ കുടുംബാംഗങ്ങള്ക്ക് നഷ്ടപരിഹാരം നല്കാന് സാധിക്കില്ലെന്ന് കേന്ദ്രം അറിയിച്ചു.
ദേശീയ ദുരന്തനിവാരണ നിയമം അനുസരിച്ച് പ്രകൃതിദുരന്തങ്ങളെ മാത്രമേ പരിഗണിക്കാന് സാധിക്കുകയുള്ളൂവെന്നും കേന്ദ്രം വ്യക്തമാക്കി. നിലവില് രാജ്യത്ത് കോവിഡ് ബാധിച്ച് 3.85 ലക്ഷത്തിലധികം പേരാണ് മരിച്ചത്. കോവിഡ് ബാധിച്ച് മരിച്ചവരുടെ കുടുംബാംഗങ്ങള്ക്ക് നാലുലക്ഷം രൂപ വീതം നല്കാന് സംസ്ഥാനങ്ങളുടെ സാമ്പത്തിക സ്ഥിതി അനുവദിക്കുന്നില്ലെന്നും കേന്ദ്രം വ്യക്തമാക്കി.
അതേസമയം കോവിഡിതര രോഗങ്ങള് ബാധിച്ച് മരിച്ചവരുടെ കുടുംബങ്ങള്ക്ക് നഷ്ടപരിഹാരം നിഷേധിക്കുന്നത് ഉചിതമല്ലെന്നും കേന്ദ്രം സത്യവാങ്മൂലത്തില് പറയുന്നു. നിലവില് സംസ്ഥാനങ്ങളുടെ ആരോഗ്യചെലവ് വര്ധിച്ചിട്ടുണ്ട്. അതേസമയം നികുതി വരുമാനം കുറവാണ്. കോവിഡ് ബാധിച്ച് മരിച്ച ലക്ഷക്കണക്കിന് ആളുകളുടെ കുടുംബങ്ങള്ക്ക് നഷ്ടപരിഹാരം നല്കുന്നത് നിലവിലെ സാമ്പത്തിക സ്ഥിതിയില് സംസ്ഥാനങ്ങള്ക്ക് സാധിക്കില്ലെന്നും കേന്ദ്രം വ്യക്തമാക്കി.