Technology
ഇലോണ്‍ മസ്‌കിന്റെ സ്പേസ് എക്സ് സ്റ്റാർഷിപ്പ് റോക്കറ്റ് പെട്ടിത്തെറിച്ചു
ഇലോണ്‍ മസ്‌കിന്റെ സ്പേസ് എക്സ് സ്റ്റാർഷിപ്പ് സൂപ്പര്‍ ഹെവി റോക്കറ്റ് വിക്ഷേപണത്തിന് തൊട്ടുപിന്നാലെ പെട്ടിത്തെറിച്ചു. വിക്ഷേപണത്തിന് മൂന്ന് മിനിറ്റിന് ശേഷം സ്റ്റാര്‍ഷിപ്പ് റോക്കറ്റില്‍നിന്ന് വേര്‍പ്പെടുത്തണം. എന്നാൽ ഇത് വേര്‍പ്പെടുത്താൻ സാധിച്ചില്ല. തുടർന്ന് റോക്കറ്റ് പൊട്ടിത്തെറിക്കുകയായിരുന്നു.
സ്പേസ് എക്‌സിന്റെ സ്ഥാപകനും സിഇഒയുമായ മസ്‌ക് അടുത്ത സ്റ്റാർഷിപ്പ് പരീക്ഷണ ലോഞ്ച് ഏതാനും മാസങ്ങൾക്കുള്ളിൽ നടക്കുമെന്ന് ട്വിറ്ററിലൂടെ അറിയിച്ചു. പരീക്ഷണ പറക്കല്‍ ഒന്നരമണിക്കൂറാണ് നിശ്ചയിച്ചിരുന്നത്. എന്നാൽ തകരാർ കാരണം പരീക്ഷണം വിജയിച്ചില്ല.
സ്റ്റാര്‍ഷിപ്പിന്റെ രണ്ട് വിഭാഗങ്ങള്‍ ഒന്നിച്ചുള്ള ആദ്യ വിക്ഷേപണമായിരുന്നു ഇത്. സ്റ്റാര്‍ഷിപ് പേടകവും സൂപ്പര്‍ ഹെവി എന്ന റോക്കറ്റും അടങ്ങുന്നതായിരുന്നു സ്റ്റാര്‍ഷിപ് സംവിധാനം. ഇത് പൂര്‍ണമായും സ്റ്റെയിന്‍ലെസ് സ്റ്റീല്‍ നിര്‍മ്മിതമാണ്. ഒരു യാത്രയില്‍ സ്റ്റാര്‍ഷിപ്പിന് 250 ടണ്‍ ഭാരം ഉയര്‍ത്താനും 100 പേരെ ഉള്‍ക്കൊള്ളാനും കഴിയുമെന്നും പേടകത്തിന്റെ വാഹകശേഷി 150 മെട്രിക് ടണ്‍ ആണെന്നുമാണ് റിപ്പോർട്ട് ചെയ്തത്.
ഉപഗ്രഹങ്ങളും ബഹിരാകാശ ടെലിസ്‌കോപ്പുകളും ബഹിരാകാശത്തെത്തിക്കാനും ചന്ദ്രനില്‍ ആളുകളേയും സാമഗ്രിഹകളേയുമൊക്കെ എത്തിക്കാനുള്ള ശേഷി സ്പേസ് എക്സിനുണ്ടെന്നായിരുന്നു വിലയിരുത്തൽ. ഭൂമിയിലെ യാത്രക്കും സ്റ്റാര്‍ഷിപ്പ് ഉപയോഗിക്കാം. ലോകത്തിന്റെ എവിടേയും ഒരുമണിക്കൂറില്‍ സഞ്ചരിച്ചെത്താനും സാധിക്കും. മീഥെയിന്‍ ആണ് റോക്കറ്റിന്റെ പ്രധാന ഇന്ധനം.
ചൊവ്വയിലും മറ്റും കാണപ്പെടുന്ന മീഥെയ്‌നും ഭാവിയില്‍ ഉപയോഗിക്കാനാകുമെന്നാണ് കണക്കുകൂട്ടല്‍. റാപ്റ്ററുകള്‍ എന്ന് പേരുള്ള കരുത്തുറ്റ എന്‍ജിനുകളാണ് സ്റ്റാര്‍ഷിപ്പിന് ഊര്‍ജം നല്‍കുന്നത്. 33 എന്‍ജിനുകള്‍ റോക്കറ്റിലുണ്ട്. പേടകത്തില്‍ മൂന്ന് റാപ്റ്റര്‍ എന്‍ജിനുകളും മൂന്ന് റാപ്റ്റര്‍ വാക്വം എന്‍ജിനുകളുമാണുണ്ടായിരുന്നത്.
