ഡൈ അടിച്ചാൽ അലർജി വരാറുണ്ടോ? മുടി കറുപ്പിക്കാൻ ഒരു എണ്ണക്കൂട്ട് ഇതാ

ഒരു നര കാണുമ്പോൾ തന്നെ ടെൻഷൻ അടിക്കുന്നവരാണ് ഭൂരിഭാഗം ആളുകളും. പ്രായമാകുന്നതിന് മുൻപ് തന്നെ മുടി നരച്ച് പോകുന്നത് പലരെയും വിഷമിപ്പിക്കാറുണ്ട്. മാറി കൊണ്ടിരിക്കുന്ന ജീവിതശൈലിയാണ് ഇതിൻ്റെ പ്രധാന കാരണമെന്ന് തന്നെ പറയാം. മാത്രമല്ല അമിതമായ മലിനീകരണവും ശ്രദ്ധക്കുറവുമൊക്കെ പലപ്പോഴും മുടിയുടെ ഭംഗിയും നിറവുമൊക്കെ കെടുത്താറുണ്ട്. മുടി നരച്ച് പോകുന്നതിന് പോഷകാഹാരക്കുറവും ഒരു പ്രധാന കാരണമാണ്. മുടി കറുപ്പിക്കാൻ ഡൈ ഉപയോഗിക്കാൻ കഴിയാത്തവർക്ക് എളുപ്പത്തിൽ വീട്ടിൽ തയാറാക്കാവുന്ന ഒരു എണ്ണക്കൂട്ട്.

കറികൾക്ക് മണവും രുചിയും നൽകുന്ന കറിവേപ്പില മുടിയുടെ നല്ലൊരു സുഹൃത്താണെന്ന് തന്നെ പറയാം. മുടി വളരാനും മുടിയ്ക്ക് കറുപ്പ് നിറം നൽകാനും കറിവേപ്പില ഏറെ സഹായിക്കും. ഇതിൽ അടങ്ങിയിരിക്കുന്ന ആൻ്റി ഓക്സിഡൻ്റുകൾ മുടിയെ വേരിൽ നിന്ന് ബലപ്പെടുത്താനും അതുപോലെ തിളക്കവും നിറവും വർധിപ്പിക്കാനും സഹായിക്കും. ഇതിൽ അടങ്ങിയിരിക്കുന്ന വൈറ്റമിൻ ബിയാണ് മുടിയുടെ ആരോഗ്യത്തിന് പല തരത്തിലുള്ള ഗുണങ്ങൾ നൽകുന്നത്.

മുടിയുടെ പല പ്രശ്നങ്ങൾക്കുമുള്ള പരിഹാരമാണ് ഉലുവ. കറികൾക്ക് രുചി കൂട്ടുന്ന ഉലുവ പല തരത്തിലുള്ള ഗുണങ്ങൾ മുടിയ്ക്കും നൽകാറുണ്ട്. മുടി വളർച്ചയ്ക്ക് സഹായിക്കുന്ന അമിനോ ആസിഡുകൾ ഇതിൽ ധാരാളം അടങ്ങിയിട്ടുണ്ട്. താരൻ മാറ്റാനും ഉലുവ വളരെയധികം സഹായിക്കും. മുടിയുമായി ബന്ധപ്പെട്ടുള്ള മിക്ക പ്രശ്നങ്ങൾക്കുമുള്ള പരിഹാരമാണ് ഉലുവ.

മുടിയുടെ കറുപ്പിനും ആരോ​ഗ്യത്തിനും ഏറെ നല്ലതാണ് നെല്ലിക്ക. ഇത് വെറുതെ കഴിക്കുന്നതും അതുപോലെ മുടിയിൽ നെല്ലിക്കപ്പൊടി ഉപയോ​ഗിക്കുന്നതുമൊക്കെ പല തരത്തിലുള്ള​ ​ഗുണങ്ങളാണ് നൽകുന്നത്. നെല്ലിക്കയിൽ അടങ്ങിയിരിക്കുന്ന പല ഘടകങ്ങളും മുടി കറുപ്പിക്കാൻ നല്ലതാണ്. ഇതിൽ ധാരാളം വൈറ്റമിൻ സി അടങ്ങിയിട്ടുണ്ട്. മുടി വളർത്താനും അതുപോലെ മുടി കറുപ്പിക്കാനും ഏറെ നല്ലതാണ് നെല്ലിക്ക. ഇത് കഴിക്കുന്നതും മുടിയിൽ തേയ്ക്കുന്നതും പല തരത്തിലുള്ള ​ഗുണങ്ങൾ നൽതും. നെല്ലിക്കയിട്ട് കാച്ചുന്ന എണ്ണ മുടിയ്ക്ക് ഏറെ നല്ലതാണ്. ഇരുമ്പ്, ഫോസ്ഫറസ്, കാൽസ്യം, വൈറ്റമിൻ സി തുടങ്ങി മുടിയ്ക്ക് ആവശ്യത്തിനായ പല പോഷകങ്ങളും നെല്ലിക്കയിൽ അടങ്ങിയിട്ടുണ്ട്. രക്തം ശുദ്ധീകരിച്ച് അകാല നര മാറ്റാനും മുടിയുടെ സ്വഭാവിക നിറം വർധിപ്പിക്കാനും നെല്ലിക്കയ്ക്ക് സാധിക്കും.

നെല്ലിക്ക ഉണക്കിയതും ഉലുവയും കറിവേപ്പിലയും ഒരു പാനിലിട്ട് നന്നായി ചൂടാക്കുക. ചൂട് മാറിയ ശേഷം ഇത് ഒരു മിക്സിയിലിട്ട് നന്നായി പൊടിപ്പിച്ചെടുക്കുക. ഇനി ഒരു പാത്രത്തിൽ എണ്ണ ചൂടാക്കുക. ഇതിലേക്ക് ഈ പൊടിയുമിട്ട് തിളപ്പിക്കുക. ഇത് ചൂടാറിയ ശേഷം ഒരു തുണിയിലൂടെ അരിച്ച് എടുക്കുക. ഈ എണ്ണ കുളിക്കുന്നതിന് അര മണിക്കൂർ മുൻപേ തേച്ച് പിടിപ്പിക്കുക. അതിന് ശേഷം വീര്യം കുറഞ്ഞ ഷാംപൂ ഉപയോഗിച്ച് കഴുകാം.