പ്രവാസി വാർത്തകൾ
സൗദിയിലേക്ക് പുതിയൊരു വിസ കൂടി; ഓണ്‍ലൈനായി അപേക്ഷിച്ചാല്‍ ഉടന്‍ വിസ ഇ-മെയിലില്‍
സൗദിയിലേക്ക് പുതിയൊരു ബിസിനസ്റ്റ് വിസ കൂടി ഏര്‍പ്പെടുത്തി. വിസിറ്റര്‍ ഇന്‍വെസ്റ്റര്‍ എന്ന പേരിലുള്ള വിസ അനുവദിക്കുമെന്നാണ് വിദേശ മന്ത്രാലയം അറിയിച്ചത്. വിവിധ രാജ്യങ്ങളിലെ ബിസിനസുകാര്‍ക്ക് സൗദി അറേബ്യയിലെ നിക്ഷേപ അവസരങ്ങള്‍ പരിചയപ്പെടുത്താന്‍ അവസരമൊരുക്കുകയാണ് പുതിയ വിസയുടെ ലക്ഷം.
രാജ്യത്തെ നിക്ഷേപ അന്തരീക്ഷം പഠിക്കാന്‍ ഇതുവഴി നിക്ഷേപകര്‍ക്ക് അവസരം ലഭിക്കും. ബിസിനസ് വിസിറ്റ് വിസ ഓണ്‍ലൈന്‍ ആയി ലഭിക്കാന്‍ വിദേശ മന്ത്രാലയത്തിന്റെ ഏകീകൃത വിസാ പ്ലാറ്റ്‌ഫോം വഴി അപേക്ഷ സമര്‍പ്പിക്കാം.അപേക്ഷകളില്‍ നടപടികള്‍ പൂര്‍ത്തിയാക്കി തല്‍ക്ഷണം വിസകള്‍ അനുവദിച്ച് നിക്ഷേപകന് ഇമെയില്‍ വഴി അയക്കും.
ആദ്യ ഘട്ടത്തില്‍ ഏതാനും രാജ്യങ്ങളില്‍ നിന്നുള്ള നിക്ഷേപകര്‍ക്കാണ് പുതിയ സേവനത്തിന്റെ പ്രയോജനം ലഭിക്കുക. രണ്ടാം ഘട്ടത്തില്‍ മറ്റു രാജ്യങ്ങളിലെ നിക്ഷേപകര്‍ക്കും ഇ-വിസ സേവനം പ്രയോജനപ്പെടുത്താന്‍ സാധിക്കും. വിദേശകാര്യ, നിക്ഷേപ മന്ത്രാലയങ്ങൾ തമ്മിലുള്ള സഹകരണത്തിന്റെയും ഏകീകരണത്തിന്റെയും വിജയത്തിന്റെ ചട്ടക്കൂടിലാണ് വിസിറ്റിംഗ് ഇൻവെസ്റ്റർ ബിസിനസ് വിസ സേവനം ആരംഭിക്കുന്നതെന്ന് നിക്ഷേപ മന്ത്രി ഖാലിദ് അൽ ഫാലിഹ് ട്വീറ്റിൽ പറഞ്ഞു.
രാജ്യത്ത് ബിസിനസ്സ് അവസരങ്ങൾ കണ്ടെത്താൻ താൽപ്പര്യമുള്ള നിക്ഷേപകർക്ക് നടപടിക്രമങ്ങൾ ലളിതമാക്കുന്നതിനുള്ള നിക്ഷേപ മന്ത്രാലയത്തിന്റെ ശ്രമങ്ങളെ വിദേശകാര്യ മന്ത്രാലയം പിന്തുണയ്ക്കുന്നുവെന്ന് അദ്ദേഹം കൂട്ടിച്ചേർത്തു.
“രാജ്യത്തെ പരിസ്ഥിതിയെക്കുറിച്ചും നിക്ഷേപ സാധ്യതകളെക്കുറിച്ചും പഠിക്കാൻ ആഗ്രഹിക്കുന്ന നിക്ഷേപകന്റെ യാത്ര സുഗമമാക്കുന്നതിനുള്ള നിക്ഷേപ മന്ത്രാലയത്തിന്റെ ശ്രമങ്ങളെ പിന്തുണച്ചതിന് വിദേശകാര്യ മന്ത്രാലയത്തിലെ മന്ത്രിക്കും സഹോദരങ്ങൾക്കും ഞാൻ നന്ദി പറയുന്നു,” അൽ-ഫാലിഹ് കൂട്ടിച്ചേർത്തു. ഗവൺമെന്റ് കരാറുകൾ ഉറപ്പിക്കുന്നതിനായി ബഹുരാഷ്ട്ര കമ്പനികൾ 2023-ൽ സൗദി അറേബ്യയിലേക്ക് തങ്ങളുടെ ആസ്ഥാനം മാറ്റുന്നത് നികുതി ഇളവുകൾക്ക് അർഹമായേക്കുമെന്ന് മാർച്ചിൽ അൽ-ഫാലിഹ് സൂചിപ്പിച്ചിരുന്നു.
