ആരോഗ്യം
ഇന്ന് ലോക എയ്ഡ്‌സ് ദിനം
ഇന്ന് ലോക എയ്ഡ്‌സ് ദിനം. ഇരുപതാം നൂറ്റാണ്ടില്‍ ഏറ്റവും കൂടുതല്‍ ജനശ്രദ്ധ പിടിച്ചു പറ്റിയ മാരകരോഗമാണ് എയ്ഡ്‌സ്. എല്ലാ വര്‍ഷവും ഡിസംബര്‍ ഒന്ന് ലോക എയ്ഡ്‌സ് ദിനമായി ആചരിക്കുന്നു.
എച്ച്.ഐ.വി. ( ഹ്യുമന്‍ ഇമ്മ്യൂണോ ഡിഫിഷ്യന്‍സി വൈറസ് )ബാധിച്ചതിന്റെ ഫലമായി മനുഷ്യന് രോഗ പ്രതിരോധശേഷി നഷ്ടപ്പെടുകയും തത്ഫലമായി മറ്റു മാരക രോഗങ്ങള്‍ പിടിപെടുകയും ചെയ്യുന്ന അവസ്ഥയാണ്, അല്ലെങ്കില്‍ സിന്‍ഡ്രോം ആണ് എയ്ഡ്‌സ്.അക്വായഡ് ഇമ്മ്യൂണ്‍ ഡിഫിഷ്യന്‍സി സിന്‍ഡ്രംഎന്നതിന്റെ ചുരുക്കരൂപമാണത്.
1981 ല്‍ സുരക്ഷിതമല്ലാത്ത ലൈംഗികബന്ധം ശീലമാക്കിയ ഏതാനം അമേരിക്കന്‍ യുവാക്കളിലാണ് ഈ അവസ്ഥ ആദ്യമായി സ്ഥിരീകരിച്ചത്.
ഈ രോഗം ആദ്യമായി കണ്ടെത്തിയത്. സ്വവര്‍ഗരതിയാണ് രോഗകാരണമെന്ന് അന്നു കരുതിയിരുന്നു. പിന്നീട് ,മയക്കു മരുന്നിന് അടമകളായിരുന്നവരിലും ഈ രോഗം കണ്ടെത്തി.
ഈ രോഗത്തിന് കാരണമാകുന്ന വൈറസിനെ ‘ഹ്യൂമന്‍ ഇമ്മ്യൂണോ ഡെഫിഷ്യന്‍സി വൈറസ്’ അഥവാ ‘എച്ച്.ഐ.വി’ എന്നു വിളിക്കുന്നു. 1988 മുതലാണ് ലോക എയ്ഡ്‌സ് ദിനം ആചരിക്കാന്‍ തുടങ്ങിയത്.
എയ്ഡ്‌സ് ബാധിതര്‍ക്ക് സാന്ത്വനം പകരാനും രോഗത്തിനെതിരെ ബോധവല്‍ക്കരണം നടത്താനുമാണ് ഈ ദിനത്തില്‍ ലോകം അണിനിരക്കുന്നത്.
ജനീവയില്‍ വേള്‍ഡ് ഹെല്‍ത്ത് ഓര്‍ഗനൈസേഷന്റെ പബ്ലിക് ഇന്‍ഫര്‍മേഷന്‍ ഓഫീസര്‍മാര്‍ ആയിരുന്ന ജെയിംസ് ബണ്‍,തോമസ് നെറ്റര്‍ എന്നിവര്‍ ചേര്‍ന്നാണ് ഈ ദിനത്തിന് തുടക്കം കുറിച്ചത്.
കേരളത്തില്‍ എയ്ഡ്‌സ് രോഗബാധ തടയാനും ബോധവല്‍ക്കരണ പ്രവര്‍ത്തനങ്ങള്‍ നടത്താനുമാണ് കേരള സ്റ്റേറ്റ് എയ്ഡ്‌സ് കണ്‍ട്രോള്‍ സൊസൈറ്റി രൂപീകരിച്ചത്.
2008 മുതല്‍ 2015 വരെയുള്ള കാലയളവില്‍ സൊസൈറ്റി നടത്തിയ പഠനമനുസരിച്ച് സംസ്ഥാനത്ത് 27000 എയ്ഡ്‌സ് രോഗികളുണ്ട്.
തിരുവനന്തപുരം ജില്ലയിലാണ് ഏറ്റവും കൂടുതല്‍ എയ്ഡ്‌സ് രോഗികളുള്ളത്. 5500 ഓളം ആളുകളാണ് അവിടെ രോഗികളായിട്ടുള്ളത്. സുരക്ഷിതമല്ലാത്ത ലൈംഗിക ബന്ധം രോഗികളുടെ എണ്ണം കൂട്ടാനും കാരണമായിട്ടുണ്ട് എന്നാണ് സൊസൈറ്റിയുടെ വിലയിരുത്തല്‍.
എച്ച്‌ഐവി രോഗബാധയ്ക്ക് മൂന്നു ഘട്ടങ്ങളാണുള്ളത്: അക്യൂട്ട് (രോഗാണുബാധ ഉണ്ടായതിനെത്തുടര്‍ന്ന് പെട്ടെന്നുണ്ടാകുന്ന അസുഖം) രോഗാണുബാധ, രോഗലക്ഷണങ്ങളില്ലാത്ത ക്ലിനിക്കല്‍ ലേറ്റന്‍സി എന്ന ഘട്ടം, എയ്ഡ്‌സ് എന്നിവയാണ് മൂന്നു ഘട്ടങ്ങള്‍.
2010ന് ശേഷം ഓരോ വര്‍ഷവും പുതുതായി എച്ച്.ഐ.വി ബാധിക്കുന്നവരില്‍ നിന്ന് 23 ശതമാനത്തിന്റെ കുറവാണ് കഴിഞ്ഞ വര്‍ഷം രേഖപ്പെടുത്തിയതെന്ന ഐക്യരാഷ്ട്ര സംഘടനയുടെ കണക്ക് ഏറെ ആശ്വാസം പകരുന്നതാണ്.
കേരളത്തിലും പുതിയ എയ്ഡ്‌സ് ബാധിതരുടെ എണ്ണം കുറയുകയാണെന്ന് കണക്കുകള്‍ വ്യക്തമാക്കുന്നു. ലോകത്ത് കൊവിഡ് വ്യാപനം അതിരൂക്ഷമായ സാഹചര്യത്തില്‍ എയ്ഡ്‌സ് പ്രതിരോധ പ്രവര്‍ത്തനങ്ങളെയും അത് ബാധിച്ചിട്ടുണ്ട്.
എങ്കിലും എയ്ഡ്‌സ് പ്രതിരോധ പ്രവര്‍ത്തനങ്ങളില്‍ കഴിഞ്ഞ ഇരുപത് വര്‍ഷം കൊണ്ട് നേടിയെടുത്ത പുരോഗതി നിലനിര്‍ത്താനുള്ള തീവ്ര യത്‌നത്തിലാണ് യു.എന്‍ അടക്കമുള്ള സംഘടനകള്‍.
അന്താരാഷ്ട്ര തലത്തില്‍ എയ്ഡ്‌സ് രോഗത്തിന് സാമൂഹികാവബോധം സൃഷ്ടിക്കുന്നതിന് വിവിധ സംഘടനകള്‍ അക്ഷീണം പ്രവര്‍ത്തിക്കുന്നു. ചുവപ്പ് റിബണാണ് എയ്ഡ്‌സ് ദിനത്തിന്റെ അടയാളമായി കണക്കാക്കപ്പെടുന്നത്.
