വർധിക്കുന്ന ആശങ്ക; ലോകത്ത് 13.59 കോടി കടന്ന് വൈറസ് ബാധിതർ

ലോകത്ത് കൊവിഡ് വ്യാപനം രൂക്ഷമായി തുടരുന്നു. 24 മണിക്കൂറിനിടെ ആറര ലക്ഷം പേർക്കാണ് വൈറസ് ബാധ സ്ഥിരീകരിച്ചത്. ഇതോടെ ആകെ രോഗബാധിതരുടെ എണ്ണം 13.59 കോടി പിന്നിട്ടു. മരണസംഖ്യ 29.38 ലക്ഷം കടന്നു. നിലവിൽ രണ്ട് കോടി മുപ്പത്തിയാറ് ലക്ഷം പേർ ചികിത്സയിലുണ്ട്.

ഇന്ത്യയിൽ രോഗികളുടെ എണ്ണം കുത്തനെ ഉയരുകയാണ്. തുടർച്ചയായ നാലാം ദിവസവും പ്രതിദിന രോഗികളുടെ എണ്ണം ഒരു ലക്ഷം പിന്നിട്ടു. കഴിഞ്ഞദിവസം 1.45 ലക്ഷം പേർക്കാണ് രോഗം സ്ഥിരീകരിച്ചത്.നിലവിൽ പത്ത് ലക്ഷത്തിലധികം പേർ ചികിത്സയിലുണ്ട്.

ചികിത്സയിലുള്ളവരുടെ 72 ശതമാനവും മഹാരാഷ്ട്ര, ഛത്തീസ്ഗഢ്, കർണാടക, യു.പി, കേരളം എന്നീ അഞ്ചു സംസ്ഥാനങ്ങളിലായാണ്.മരണസംഖ്യ 1.69 ലക്ഷം കടന്നു. രോഗികളുടെ എണ്ണത്തിൽ അമേരിക്കയും ബ്രസീലും മാത്രമാണ് ഇന്ത്യയ്ക്ക് മുന്നിലുള്ളത്.

അമേരിക്കയിൽ കഴിഞ്ഞ ദിവസം അരലക്ഷത്തിലധികം കേസുകളാണ് റിപ്പോർട്ട് ചെയ്തത്. ഇതോടെ ആകെ രോഗബാധിതരുടെ എണ്ണം മൂന്ന് കോടി പതിനെട്ട് ലക്ഷമായി ഉയർന്നു.5.75 ലക്ഷം പേർ മരിച്ചു. ബ്രസീലിൽ ഒരു കോടി മുപ്പത്തിനാല് ലക്ഷം രോഗബാധിതരാണ് ഉള്ളത്. 3.51 ലക്ഷം പേർ മരിച്ചു.