ദേശീയം
നിയമസഭ തെരഞ്ഞെടുപ്പ്;ബംഗാളിലും അസമിലും രണ്ടാംഘട്ട പരസ്യ പ്രചാരണം ഇന്ന് അവസാനിക്കും
ബംഗാളിലും അസമിലും രണ്ടാംഘട്ട പരസ്യ പ്രചാരണം ഇന്ന് അസാനിക്കും. നന്ദിഗ്രാം അടക്കം ബംഗാളിലെ മുപ്പതും അസമിലെ മുപ്പത്തി ഒമ്പതും മണ്ഡലങ്ങളിലാണ് വ്യാഴാഴ്ച വോട്ടെടുപ്പ് നടക്കുക. മുഖ്യമന്ത്രി മമത ബാനര്‍ജിയും ടി.എം.സി വിട്ട് ബിജെപിയിലെത്തിയ സുവേന്ദു അധികാരിയും ഏറ്റുമുട്ടുന്ന നന്ദിഗ്രാം ഉള്‍പ്പെടെ 30 മണ്ഡലങ്ങളിലാണ് രണ്ടാം ഘട്ട വോട്ടെടുപ്പ് നടക്കുന്നത്.
ആഭ്യന്തര മന്ത്രി അമിത് ഷാ ഇന്ന് നന്ദിഗ്രാമില്‍ പ്രചാരണത്തിനെത്തും. സംസ്‌കാരത്തെ സ്‌നേഹിക്കാത്തവര്‍ക്ക് രാഷ്ട്രീയം സാധ്യമല്ലെന്നും നന്ദിഗ്രാമില്‍ അധികാരി കുടുംബം ഗുണ്ടായിസം കളിക്കുന്നു എന്നുമാണ് മമത ബാനര്‍ജിയുടെ ആരോപണം. ന്യൂനപക്ഷത്തെ പ്രീതിപ്പെടുത്തുന്ന മമത ബംഗാളിനെ മിനി പാകിസ്ഥാനാക്കി എന്നാണ് സുവേന്ദു അധികാരിയുടെ പ്രചാരണം.
രണ്ടാം ഘട്ടത്തില്‍ 39 മണ്ഡലങ്ങള്‍ ബൂത്തിലെത്തുന്ന അസമില്‍ 345 സ്ഥാനാര്‍ത്ഥികളാണ് മത്സര രംഗത്തുള്ളത്. വികസനം ഉയര്‍ത്തി ബിജെപി പ്രചാരണം തുടരുമ്പോള്‍ സിഎഎയും തൊഴിലില്ലായ്മയുമാണ് കോണ്‍ഗ്രസിന്റെ പ്രചാരണ വിഷയങ്ങളാകുന്നത്.
