രാജ്യാന്തരം
ദുബായില്‍ റമദാന്‍ മാസത്തിലേക്കുള്ള കോവിഡ് മുന്‍കരുതല്‍ നടപടികള്‍ പ്രഖ്യാപിച്ചു
ദുബായിൽ വിശുദ്ധ റമദാന്‍ മാസത്തിലേക്കുള്ള കോവിഡ് മുന്‍കരുതല്‍ നടപടികള്‍ ദുബായ് സുപ്രീം കമ്മിറ്റി ഓഫ് ക്രൈസിസ് ആന്‍ഡ് ഡിസാസ്റ്റര്‍ മാനേജ്മെന്റ് പ്രഖ്യാപിച്ചു. വലിയ സാമൂഹിക ഒത്തുചേരലുകള്‍ ഒഴിവാക്കണമെന്നും, പ്രത്യേകിച്ച്‌ പ്രായമായവരെയും വിട്ടുമാറാത്ത രോഗങ്ങളുള്ളവരെയും കോവിഡ് -19 അപകടസാധ്യതകളിലേക്ക് നയിക്കുന്നത് തടയാനാണ് ഈ നടപടിയെന്നും സമതിയുടെ മാര്‍ഗനിര്‍ദേശങ്ങളില്‍ പറയുന്നു.
റമദാന്‍ ടെന്റുകള്‍ക്കും ഒപ്പം ഇഫ്താര്‍ സംഭാവന എന്നിവയ്ക്കായുള്ള ടെന്റുകള്‍ക്കും നിരോധനമുണ്ട്. മുന്‍കരുതല്‍ നടപടികള്‍ കര്‍ശനമായി പാലിക്കണമെന്ന വ്യവസ്ഥയില്‍ പള്ളികളില്‍ താരവീഹ് നമസ്കാരത്തിന് അനുമതിയുണ്ടാവും. തറവീഹ്, ഇഷ നമസ്കാരങ്ങളുടെ പരമാവധി സമയം 30 മിനുറ്റായും നിജപ്പെടുത്തി. അതേസമയം റമദാനിലെ അവസാന 10 ദിവസങ്ങളില്‍ നടത്തുന്ന് ഖിയാം-ഉല്‍-ലെയ്ല്‍ പ്രാര്‍ത്ഥന സംബന്ധിച്ച തീരുമാനം സാഹചര്യങ്ങള്‍ വിലയിരുത്തി അതിന്റെ അടിസ്ഥാനത്തില്‍ പിന്നീട് പ്രഖ്യാപിക്കുമെന്ന് സമിതി വ്യക്തമാക്കി.
യുഎഇയില്‍ പള്ളികളിലെ വനിതകള്‍ക്കുള്ള പ്രാര്‍ഥനാ ഹാളുകള്‍ അടച്ചിരിക്കും. പള്ളികളിലെ മതപ്രഘോഷണവും ചര്‍ച്ചകളും തത്ക്കാലത്തേയ്ക്ക് ഉണ്ടാകില്ല. പകരം ഓണ്‍ലൈനിലൂടെ നടക്കും. റമദാനിലെ അവസാന 10 ദിവസങ്ങളില്‍ അര്‍ദ്ധരാത്രി കഴിഞ്ഞുള്ള പ്രത്യേക പ്രാര്‍ഥനകളെ കുറിച്ച് അധികൃതര്‍ പൊതുജനങ്ങളെ അറിയിക്കും. രാജ്യത്തെ കൊവിഡിന്റെ സ്ഥിതി വിലയിരുത്തിയതിന് ശേഷമായിരിക്കും ഇത്.
