വിദേശ സർവകലാശാലകളുടെ കോഴ്സുകൾ ഇന്ത്യയിൽ പഠിക്കാം; ക്യാമ്പസുകൾ തുറക്കാനൊരുങ്ങുന്നതായി പ്രധാനമന്ത്രി

യേൽ, ഓക്സ്ഫോർഡ്, സ്റ്റാൻഫോർഡ് തുടങ്ങിയ പ്രമുഖ വിദേശ സർവകലാശാലകളുടെ ക്യാമ്പസുകൾ ആദ്യമായി രാജ്യത്ത് സ്ഥാപിക്കുന്നതിന് അനുവാദം നൽകുന്നതിനുള്ള നടപടികൾ സ്വീകരിക്കാനൊരുങ്ങുന്നതായി പ്രധാനമന്ത്രി നരേന്ദ്ര മോദി. രാജ്യത്തെ ഉന്നത വിദ്യാഭ്യാസ നവീകരണത്തിന്റെ ഭാഗമായാണ് ഈ ചുവടുവയ്പ്പ്.

ഇതുമായി ബന്ധപ്പെട്ട് പൊതുജനാഭിപ്രായം തേടുന്നതിനായുള്ള കരട് നിയമം യൂണിവേഴ്സിറ്റി ഗ്രാൻഡ് കമ്മീഷൻ റെഗുലേഷൻ വ്യാഴാഴ്ച പുറത്തിറക്കി. കരട് നിയമം അനുസരിച്ച് വിദ്യാർത്ഥികളുടെ പ്രവേശനത്തിനുള്ള മാനദണ്ഡങ്ങൾ, ഫീസ് ഘടന, സ്കോളർഷിപ്പ് തുടങ്ങിയ കാര്യങ്ങൾ സ്ഥാപനങ്ങൾക്ക് തീരുമാനിക്കാം. കൂടാതെ അദ്ധ്യാപകരെയും മറ്റ് ജീവനക്കാരെയും നിയമിക്കുന്നതിനുള്ള അവകാശവും സ്ഥാപനങ്ങൾക്കാകും.

രാജ്യത്തെ വിദ്യാർത്ഥികൾക്ക് താങ്ങാനാവുന്ന ചെലവിൽ വിദേശ കോഴ്സുകൾ പൂർത്തിയാക്കി സർട്ടിഫിക്കറ്റുകൾ നേടാനും ഇന്ത്യയെ ആഗോള പഠന കേന്ദ്രമാക്കി മാറ്റാനാണ് ശ്രമിക്കുന്നതെന്നാണ് സർക്കാർ അവകാശപ്പെടുന്നത്. പ്രതിഭകളെ വാർത്തെടുക്കുന്നതിനും നിലനിർത്താനുമുള്ള ഒരു രാജ്യത്തിന്റെ കഴിവ് അളക്കുന്ന 2022ലെ ഗ്ലോബൽ ടാലന്റ് കോംപറ്റിറ്റീവ്നസ് ഇൻഡക്സിൽ 133 രാജ്യങ്ങളിൽ ഇന്ത്യ 101-ാം സ്ഥാനത്താണ്.