ഒരു കോടിയിലധികം സിം കാർഡുകൾ ബ്ലോക്ക് ചെയ്തു: തട്ടിപ്പുകാർക്കെതിരെ നടപടി കടുപ്പിച്ച് കേന്ദ്രം

വ്യാജ സിംകാർഡുകളുമായി ബന്ധപ്പെട്ട തട്ടിപ്പുകൾ തടയുന്നതിനായിടെലികോം മന്ത്രാലയം ഏകദേശം 1.66 കോടി കണക്ഷനുകൾ വിച്ഛേദിച്ചതായി മെന്നും ടെലികോം മന്ത്രാലയ ഉദ്യോഗസ്ഥർ. ഏപ്രിൽ 30 വരെയുള്ള കണക്കുകൾ പ്രകാരമാണിത്. ടെലികോം ഓപ്പറേറ്റർമാർ രാജ്യവ്യാപകമായി 18 ലക്ഷം മൊബൈൽ കണക്ഷനുകൾ ബ്ലോക്ക് ചെയ്യാൻ ഒരുങ്ങുന്നതായി അടുത്തിടെ ഒരു റിപ്പോർട്ട് പുറത്തു വന്നിരുന്നു. ടെലികമ്മ്യൂണിക്കേഷൻ വകുപ്പ് (ഡിഒടി) ഉൾപ്പെടെയുള്ള ലോ എൻഫോഴ്‌സ്‌മെന്റ് ഏജൻസികളുടെ നേതൃത്വത്തിലുള്ള വിശദമായ അന്വേഷണത്തെ തുടർന്നാണ് ഈ നിയമ നടപടികൾ.

സാമ്പത്തിക ഇടപാടുകളുമായി ബന്ധപ്പെട്ട തട്ടിപ്പുകൾക്ക് തടയിടാനും ടെലികമ്മ്യൂണിക്കേഷൻ വിഭാഗം ഉൾപ്പെടെയുള്ള മേഖല സുരക്ഷിതമാക്കാനുമുള്ള സർക്കാരിന്റെ നയപരമായ നീക്കമാണ് ഇത്. കോളുകൾ വഴിയോ, വാട്സാപ്പ് മുഖേനയോ, സന്ദേശങ്ങൾ അയച്ചോ ഇരകളെ വലയിലാക്കാൻ അവസരം കാത്തിരിക്കുന്ന തട്ടിപ്പുവീരന്മാർക്കു ഇനിയല്പം ബുദ്ധിമുട്ടേണ്ടി വരും. വ്യാജന്മാരെ പൂട്ടാനുള്ള മൾട്ടി-ടയർ സംവിധാനങ്ങൾ ആണ് വിവിധ ഏജൻസികൾ നടപ്പിലാക്കുന്നത്.

മൊബൈൽ ഫോൺ ഉപയോക്താക്കളുടെ സുരക്ഷിതത്വം കണക്കിലെടുത്താണ് 2023 മെയ് മാസത്തിൽ ടെലികോം വകുപ്പ് സഞ്ചാർ സാഥി എന്ന ജനകേന്ദ്രീകൃത പ്ലാറ്റ് ഫോം ആരംഭിച്ചത്. ജനങ്ങൾക്കു ഈ പോർട്ടൽ ഉപയോഗിച്ച് അവരുടെ പേരിൽ എത്ര സിം കാർഡുകൾ എടുത്തിട്ടുണ്ടെന്ന് കണ്ടെത്താനും ആരെങ്കിലും തങ്ങളുടെ വ്യക്തിവിവരങ്ങൾ ചോർത്തി ആ ഐഡന്റിറ്റി ഉപയോഗിച്ച് നമ്പറുകൾ എടുത്തിട്ടുണ്ടെങ്കിൽ നിർദ്ദിഷ്ട നമ്പറുകൾ കണ്ടെത്തുകയും അവ ബ്ലോക്ക് ചെയ്യാൻ അധികൃതരോട് അഭ്യർത്ഥിക്കുകയും ചെയ്യാം.

ഈ വർഷം ഏപ്രിൽ 30 നകം തന്നെ സൈബർ കുറ്റകൃത്യങ്ങളുമായി ബന്ധപ്പെട്ട 1.58 ലക്ഷം ഐഎംഇഐ (ഇന്റർനാഷണൽ മൊബൈൽ എക്യുപ്മെന്റ് ഐഡന്റിറ്റി) നമ്പറുകൾ കണ്ടെത്തി ബ്ലോക്ക് ചെയ്തതായി ഉദ്യോഗസ്ഥർ ന്യൂസ് 18 നോട് പറഞ്ഞു. ഏതെങ്കിലും ടെലികമ്മ്യൂണിക്കേഷൻ നെറ്റ്വർക്കുകളിലേക്ക് കയറിക്കൂടുന്നതു തടയാനും കൂടുതൽ നിയമവിരുദ്ധ പ്രവർത്തനങ്ങളിൽ ഏർപ്പെടാതിരിക്കാനും അധികൃതർ ഈ ഹാൻഡ്‌സെറ്റുകൾ പ്രവർത്തനരഹിതമാക്കി. കൂടാതെ, ചക്ഷുവിൽ റീ വെരിഫിക്കേഷനായി 10,000 മുതൽ 11,000 വരെ മൊബൈൽ നമ്പറുകൾ ഫ്ലാഗുചെയ്തിട്ടുണ്ട്, സംശയാസ്പദമായ പ്രവർത്തനങ്ങൾ കാരണം 52 പ്രധാന സ്ഥാപനങ്ങളെയും (പിഇ) ബ്ലോക്ക് ചെയ്തിട്ടുണ്ട്.

ടെലികോം, ആഭ്യന്തര മന്ത്രാലയം (എംഎച്ച്എ) എന്നിവയുടെ സഹകരണം വളർത്തുക എന്ന ലക്ഷ്യത്തോടെ, ടെലികോം അനുബന്ധ സൈബർ കുറ്റകൃത്യങ്ങളും സാമ്പത്തിക തട്ടിപ്പുകളും നേരിടാനുള്ള ശ്രമങ്ങൾ കാര്യക്ഷമമാക്കുന്നതിനാണ് ഡിജിറ്റൽ ഇന്റലിജൻസ് പ്ലാറ്റ്ഫോം (ഡിഐപി) ആരംഭിച്ചിരിക്കുന്നത്. വിവിധ ഏജൻസികളിൽ നിന്നുള്ള രഹസ്യ വിവരങ്ങൾ സമാഹരിക്കുന്നതിലൂടെ ടെലികോം സേവനങ്ങളുടെ ദുരുപയോഗം തിരിച്ചറിയുന്നതിനും തടയുന്നതിനുമുള്ള സംവിധാനം ഡിഐപി നടത്തുന്നതായി ഉദ്യോഗസ്ഥർ പറഞ്ഞു.

ഇതിനെല്ലാം പുറമെ, ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) ട്രൂകോളറിന് സമാനമായ കോളിംഗ് നെയിം പ്രസന്റേഷൻ (സിഎൻഎപി) സംവിധാനവും വികസിപ്പിച്ചുകൊണ്ടിരിക്കുകയാണ്, ഇത് കാൾ സ്വീകരിക്കുന്നയാളുടെ ഫോൺ സ്ക്രീനിൽ വിളിക്കുന്നയാളുടെ പേര് കാണിക്കും. ഈ സംരംഭം ടെലികമ്മ്യൂണിക്കേഷൻ രംഗത്ത് സുതാര്യതയും സുരക്ഷയും ഉറപ്പാക്കുമെന്നും നിയമാനുസൃതമായ കോളുകൾ തിരിച്ചറിയാനും തട്ടിപ്പുകൾ ഒഴിവാക്കാനും ഉപയോക്താക്കളെ സഹായിക്കുമെന്നും ടെലികോം മന്ത്രാലയ ഉദ്യോഗസ്ഥർ പറഞ്ഞു.