ദേശീയം
ഇന്ത്യയുടെ ഇതിഹാസ അത്ലറ്റ് മില്ഖാ സിങ് അന്തരിച്ചു
ഇന്ത്യയുടെ അത്ലറ്റിക് ഇതിഹാസം മില്ഖാ സിങ് അന്തരിച്ചു. 91 വയസ്സായിരുന്നു. കൊവിഡ് ബാധിച്ചതിനെ തുടര്ന്നുണ്ടായ സങ്കീര്ണതകളെ തുടര്ന്നാണ് മരണം.
ശരീരത്തിലെ ഓക്സിജന്റെ അളവ് കുറഞ്ഞതിനെ തുടര്ന്ന് മില്ഖാ സിങ്ങിനെ ചണ്ഡീഗഡിലെ പിജിഐഎംഇആര് ആശുപത്രിയില് പ്രവേശിപ്പിച്ചിരുന്നു. മെയ് 20-നാണ് അദ്ദേഹത്തിന് കൊവിഡ് സ്ഥിരീകരിച്ചത്.
ബുധനാഴ്ച നടന്ന കൊവിഡ് പരിശോധനയില് അദ്ദേഹം നെഗറ്റീവ് ആയിരുന്നു. എന്നാല് രണ്ട് ദിവസത്തിനുശേഷം പനി കൂടുകയും ഓക്സിജന് ലെവല് കുറയുകയും ചെയ്തു. ഇതോടെ 91-കാരനായ താരത്തെ ഐസിയുവിലേക്ക് മാറ്റുകയായിരുന്നു.
പറക്കും സിങ് എന്ന പേരിലറിയപ്പെടുന്ന മില്ഖ ഏഷ്യന് ഗെയിംസിലും കോമണ്വെല്ത്ത് ഗെയിംസിലും 400 മീറ്ററില് സ്വര്ണം നേടിയ ഏക ഇന്ത്യക്കാരനാണ്. 1958, 1962 വര്ഷങ്ങളില് ഏഷ്യന് ഗെയിംസില് സ്വര്ണം നേടിയ മില്ഖ സിങ് 1956 മെല്ബണ് ഒളിമ്പിക്സിലും 1960 റോം ഒളിമ്പിക്സിലും 1964 ടോക്യോ ഒളിമ്പിക്സിലും ഇന്ത്യയ്ക്ക് വേണ്ടി മത്സരിച്ചു.
ഏഷ്യന് ഗെയിംസില് നാല് തവണ സ്വര്ണ മെഡല് നേടിയിട്ടുണ്ട്. 1960-ലെ റോം ഒളിമ്പിക്സില് 400 മീറ്ററില് നാലാം സ്ഥാനത്തെത്തി. 0.1 സെക്കന്റ് വ്യത്യാസത്തിലാണ് മെഡല് നഷ്ടമായത്.