ദേശീയം
മുന്‍ കേരള രഞ്ജി ക്യാപ്റ്റനും പരിശീലകനുമായിരുന്ന എ. സത്യേന്ദ്രന്‍ അന്തരിച്ചു
മുന്‍ കേരള രഞ്ജി ടീം ക്യാപ്റ്റനും പരിശീലകനുമായിരുന്ന എ. സത്യേന്ദ്രന്‍ അന്തരിച്ചു. 78 വയസായിരുന്നു. ഹൈദരാബാദില്‍വെച്ചായിരുന്നു അന്ത്യം.
കണ്ണൂര്‍ സ്വദേശിയായ അദ്ദേഹം സ്റ്റേറ്റ് ബാങ്കില്‍ ജോലി ലഭിച്ചതോടെ ഹൈദരാബാദില്‍ സ്ഥിരതാമസമാക്കുകയായിരുന്നു. 1970-71 സീസണ്‍ മുതല്‍ 1980-81 സീസണ്‍ വരെ കേരള രഞ്ജി ടീമിനായി കളിച്ചിട്ടുണ്ട്. ബാറ്റിങ്ങിനൊപ്പം മീഡിയം പേസും വഴങ്ങിയിരുന്ന അദ്ദേഹം 32 ഫസ്റ്റ് ക്ലാസ് മത്സരങ്ങളില്‍ നിന്ന് 1291 റണ്‍സെടുത്തിട്ടുണ്ട്.
1979-ല്‍ ഷിമോഗയില്‍ കര്‍ണാടകയ്‌ക്കെതിരേ പുറത്താകാതെ നേടിയ 128 റണ്‍സാണ് ഉയര്‍ന്ന സ്‌കോര്‍. അഞ്ചു മത്സരങ്ങളില്‍ കേരളത്തെ നയിച്ച അദ്ദേഹം കേരള രഞ്ജി ടീമിനെ രണ്ടു സീസണുകളില്‍ പരിശീലിപ്പിക്കുകയും ചെയ്തിട്ടുണ്ട്.
വിരമിച്ച ശേഷം ഹൈദരാബാദ് ക്രിക്കറ്റ് അസോസിയേഷന്റെ ഭാരവാഹിയും, വെറ്ററന്‍ ക്രിക്കറ്റ് അസോസിയേഷന്‍ അംഗവുമായി പ്രവര്‍ത്തിച്ചിരുന്നു.
