അടുക്കള സിങ്കിലെ ദുർഗന്ധം മാറ്റാൻ ഇതാ ചില പൊടികൈകൾ

ഒരു വീടിൻ്റെ ഏറ്റവും പ്രധാന സ്ഥലമാണ് അടുക്കള. ഒരു വീട്ടിലെ എല്ലാവർക്കും ഭക്ഷണം പാചകം ചെയ്ത് നൽകുന്ന സ്ഥലമാണ് അടുക്കള എന്ന് എല്ലാവർക്കുമറിയാം. വ്യത്തിയും അതുപോലെ ഭം​ഗിയും ആവശ്യമുള്ള സ്ഥലം കൂടിയായിരിക്കണം അടുക്കള. പക്ഷെ ഒരു മീൻ വ്യത്തിയാക്കൽ മതി അടുക്കളയിലെ മണവും ഭം​ഗിയുമൊക്കെ പോകാൻ. ഇത് മാറ്റാൻ പിന്നെ അമ്മമാർ എന്തൊക്കെ ചെയ്യുന്നുണ്ടെന്ന് അവർക്ക് പോലും അറിയില്ല. അടുക്കളയിലെ സിങ്ക് ശ്രദ്ധിക്കേണ്ടത് ഏറെ പ്രധാനമാണ്. ഭക്ഷണം കഴിച്ച പാത്രങ്ങളെല്ലാം അടുക്കളയിൽ സിങ്കിലാണ് പൊതുവെ ഇടാറുള്ളത്. പലതരത്തിലുള്ള ബാക്ടീരിയകളും അതുപോലെ ദുർ​ഗന്ധവുമൊക്കെ സിങ്കിൽ സാധാരണമായി ഉണ്ടാകാറുണ്ട്. സിങ്കിലെ ഈ നാറ്റം കാരണം പലപ്പോഴും അടുക്കളയിൽ നിന്ന് പാചകം ചെയ്യാൻ പോലും സാധിക്കില്ല. അടുക്കളയിലെ സിങ്കിലെ ദുർ​ഗന്ധം ഇല്ലാതാക്കാൻ ചെയ്യാൻ കഴിയുന്ന ചില പൊടികൈകളുണ്ട്.

അച്ചാറുകൾ കേട് കൂടാതിരിക്കാൻ വിനാ​ഗിരി ഒഴിക്കുന്ന എല്ലാവർക്കുമറിയാവുന്ന കാര്യമാണ്. പക്ഷെ ഈ വിനാ​ഗിരി കൊണ്ട് വെറെ പല ഉപയോ​ഗങ്ങളുമുണ്ട്. സ്റ്റൗവിന് സമീപമുള്ള അടുക്കള സിങ്കിൽ നിന്ന് മണം വരാൻ തുടങ്ങിയാൽ, അത് പരിഹരിക്കാൻ വിനാഗിരി മതിയാകും. ഒരു കപ്പ് വെള്ളത്തിൽ 3 കപ്പ് വിനാഗിരി ചേർത്ത് കുറച്ച് ബേക്കിംഗ് സോഡയും ഒരു നാരങ്ങ നീരും ചേർക്കുക. ഈ മിശ്രിതം ഒഴിച്ച് സിങ്ക് വൃത്തിയാക്കുക. സിങ്കിലെ അഴുക്കും കറയും മാറ്റാനും അതുപോലെ മണം ലഭിക്കാനും ഇത് ഏറെ നല്ലതാണ്. ഇതുപോലെ പച്ചക്കറികളും ഇറച്ചിയുമൊക്കെ വിനാ​ഗിരി ഒഴിച്ച് കഴുകുന്നതും ഏറെ നല്ലതാണ്.

അടുക്കളയിലെ സിങ്കിൽ നിന്ന് ദുർഗന്ധം അകറ്റാൻ ആദ്യം സിങ്ക് നന്നായി വൃത്തിയാക്കി അത് ഉണക്കി എടുക്കുക. അതിനു ശേഷം പെപ്പർമിന്റ് ഓയിൽ ഈ സിങ്കിൽ വിതറാം. ഇതിനായി ഒരു സ്പ്രേ ബോട്ടിൽ ഉപയോഗിക്കാവുന്നതാണ്. കുറച്ച് വെള്ളം ഒഴിച്ച് അതിൽ പെപ്പർമിന്റ് ഓയിൽ ചേർത്താണ് സ്പ്രേ ചെയ്യേണ്ടത്. എന്നാൽ വെള്ളം കലർത്താതെ വെറുതെ വിതറുന്നത് നല്ല തിളക്കം നൽകാൻ സഹായിക്കും. പെപ്പർമിൻ്റ് ഓയിൽ ലഭ്യമല്ലെങ്കിൽ, കുറച്ച് പുതിന പിഴിഞ്ഞ് ജ്യൂസ് എടുത്ത് സിങ്കിൽ ഒഴിക്കാവുന്നതാണ്.

എല്ലാ വീട്ടിലെയും അടുക്കളയിൽ സുലഭമായി കാണുന്നതാണ് നാരങ്ങ. ചൂട് സമയത്ത് ഒരു നാരങ്ങ വെള്ളം കുടിക്കുന്നത് പല തരത്തിലുള്ള ​ഗുണങ്ങളാണ് നൽകുന്നത്. നാരങ്ങയുടെ നീര് സൗന്ദര്യ സംരക്ഷണത്തിനും ഏറെ മികച്ചതാണ്. എന്നാൽ ഈ നാരങ്ങയുടെ തൊലി ഉപയോ​ഗിച്ചും പല തരത്തിലുള്ള​ ​ഗുണങ്ങളുണ്ട്. നാരങ്ങ ഉപയോഗിക്കുന്നതിനും തൊലികൾ വലിച്ചെറിയുന്നതിനും പകരം, സിങ്കിലെ ദുർഗന്ധം ഇല്ലാതാക്കാൻ ഇവ ഉപയോഗിക്കാം. നാരങ്ങ നീര് പിഴിഞ്ഞ് നാരങ്ങയുടെ ഉള്ളിൽ ഉപ്പ് ചേർത്ത് സിങ്കിൽ മുഴുവൻ തേച്ച് പിടിപ്പിക്കുക. അരമണിക്കൂറോളം കുതിർത്ത ശേഷം കഴുകി വ്യത്തിയാക്കാവുന്നതാണ് ഇത് സിങ്ക് തിളങ്ങുകയും വൃത്തിയുള്ളതുമായിരിക്കും അതുപോലെ മണം ലഭിക്കാനും സഹായിക്കും.

നാഫ്തലിൻ ​ഗുളിക അഥവ പാറ്റ ​ഗുളിക പല വീടുകളിലും കാണാറുണ്ട്. കുളിമുറിയിലും ക്ലോസറ്റിലുമൊക്കെ ഈ നാഫ്തലിൻ ​ഗുളികകൾ മണത്തിന് ഉപയോ​ഗിക്കാറുണ്ട്. സിങ്കിലെ ദുർഗന്ധം അകറ്റാനുള്ള ഏറ്റവും വലിയ എളുപ്പ വഴിയാണിത്. സിങ്കിൽ നാഫ്താലിൻ ഗുളികകൾ വയ്ക്കുന്നത് ദുർഗന്ധം തടയാൻ സഹായിക്കും. പക്ഷെ പാത്രങ്ങൾക്കൊപ്പം ഒരിക്കലും നാഫ്തലിൻ ​ഗുളികകൾ ഇടാൻ പാടില്ല.

സിങ്ക് മാത്രം വ്യത്തിയായി സൂക്ഷിച്ചിട്ട് കാര്യമില്ല. സിങ്കിലേക്കുള്ള പൈപ്പുകൾ അതുപോലെ ഡ്രൈനേജ് എന്നിവയെല്ലാം വ്യത്തിയാക്കി വയ്ക്കണം. രാത്രിയിൽ കിടക്കുന്നതിന് മുൻപ് സിങ്കിൽ അൽപ്പം ബ്ലീച്ചിംഗ് പൗഡറിട്ട് അതിലേക്ക് ചൂട് വെള്ളം ഒഴിച്ചിടുക. ഇത് സിങ്കിൽ എന്തെങ്കിലും ബ്ലോക്ക് ഉണ്ടെങ്കിൽ മാറ്റാൻ സഹായിക്കും. പല വീടുകളിലും ഓടകൾ വർഷങ്ങളായി വൃത്തിയാക്കാതെ കിടക്കാറുണ്ട്. ഇത് അടുക്കളയിലെ സിങ്കിൽ ദുർഗന്ധവും ഉണ്ടാക്കും. അതുകൊണ്ട് കൃത്യമായ ഇടവേളകളിൽ വൃത്തിയാക്കുന്നതാണ് നല്ലത്.