Citizen Special
പിറന്നാൾ ആഘോഷമാക്കാൻ ദളപതി ചിത്രം ബീസ്റ്റ്; മാസ്സ് ഫസ്റ്റ് ലുക്ക് പോസ്റ്റര്‍ പുറത്ത്
തെന്നിന്ത്യന്‍ സൂപ്പര്‍ താരം ദളപതി വിജയ് നായകനാകുന്ന പുതിയ ചിത്രം ബീസ്റ്റിന്റെ ഫസ്റ്റ് ലുക്ക് പോസ്റ്റര്‍ പുറത്തിറങ്ങി. നെല്‍സനാണ്‌ ചിത്രം സംവിധാനം ചെയ്യുന്നത്. അതേസമയം വിജയുടെ 65മത് സിനിമ കൂടെയാണ് ബീസ്റ്റ്. വിജയ് ആരാധകര്‍ വളരെ പ്രതീക്ഷയോടെ കാത്തിരിക്കുന്ന സിനിമ ആയതിനാല്‍ ഫസ്റ്റ് ലുക്ക് പോസ്റ്ററിന് വമ്ബന്‍ വരവേല്‍പ്പാണ് നല്‍കുന്നത്. പോസ്റ്ററില്‍ തോക്കുമായി നില്‍ക്കുന്ന വിജയിയുടെ ചിത്രമായതിനാല്‍ മാസ്സ് ആക്ഷന്‍ സിനിമയിക്കായി കാത്തിരിക്കുന്നു എന്നാണ് ആരാധകരുടെ കമന്റുകള്‍.
ചിത്രത്തിനായി സംഗീതം ഒരുക്കുന്നത് പ്രിയ ഗായകന്‍ അനിരുദ്ധാണ്. സൂപ്പര്‍ താരം പൂജ ഹെഗ്‌ഡെ ആണ് ചിത്രത്തില്‍ നായികയായി എത്തുന്നത്. കൂടാതെ മലയാളത്തില്‍ നിന്നും നടന്‍ ഷൈന്‍ ടോം ചാക്കോയും നടി അപര്‍ണ ദാസും ചിത്രത്തില്‍ കേന്ദ്രകഥാപാത്രങ്ങളാകുന്നുണ്ട്. ദളപതി 65′ എങ്ങനെയുള്ള ചിത്രമായിരിക്കുമെന്നതില്‍ ഔദ്യോഗിക പ്രതികരണമൊന്നും വന്നിട്ടില്ലെങ്കിലും ചിത്രം ഒരു ആക്ഷന്‍ ചിത്രമായിരിക്കുമെന്ന് റിപ്പോര്‍ട്ട് ഉണ്ട്.
അതേസമയം വിജയ് നാളെ 47-ാം പിറന്നാള്‍. കോവിഡ് കാലത്ത് നിയന്ത്രണങ്ങള്‍ പാലിച്ചാണ് ആരാധകര്‍ തങ്ങളുടെ പ്രിയ നടന്റെ ആഘോഷത്തിന് ഒരുങ്ങിയിരിക്കുന്നത്. ട്വിറ്റര്‍ സ്‌പേസ് പ്ലാറ്റ്‌ഫോം വഴിയാണ് ആഘോഷം പൊടിപൊടിക്കുക.ഇന്നു രാത്രി 9 മണി മുതല്‍ ആഘോഷങ്ങള്‍ക്ക് തുടക്കമാകുമെന്നാണ് ഏറ്റവും പുതിയ വാര്‍ത്ത. ചലച്ചിത്ര മേഖലയിലെ പ്രമുഖരും താരങ്ങളും പരിപാടിയില്‍ പങ്കെടുക്കും. കീര്‍ത്തി സുരേഷ്, അനിരുധ് രവിചന്ദര്‍, ലോകേഷ് കനകരാജ്, മാളവിക മോഹനന്‍, നെല്‍സണ്‍ ദിലീപ് കുമാര്‍, എന്നിവര്‍ പങ്കെടുക്കുന്നുണ്ട്. ടിവി താരവും നടിയുമായ ദിവ്യ ദര്‍ശിനിയാണ് പരിപാടിയുടെ അവതാരക.
ആരാധകര്‍ ആവേശത്തോടെ കാത്തിരുന്ന വിജയുടെ പിറന്നാള്‍ കോവിഡ് വ്യാപനത്തെ തുടര്‍ന്ന് ട്വിറ്റര്‍ സ്‌പേസില്‍ ഒതുങ്ങിയതില്‍ വിഷമമുണ്ടെങ്കിലും പുതിയ രീതിയിലെ ആഘോഷം മികച്ചതാക്കാന്‍ എല്ലാവരും പരിശ്രമിക്കുന്നുണ്ട്. പരിപാടിയില്‍ വിജയ് പങ്കെടുക്കുന്നില്ലെങ്കിലും ട്വിറ്റര്‍ സ്‌പേസിലെ നിലവിലെ റെക്കോര്‍ഡ് തിരുത്തിക്കുറിക്കുന്ന കാഴ്ച ഇതോടെ കാണാനാകുമെന്നാണ് പ്രതീക്ഷ. പിറന്നാള്‍ ദിനത്തില്‍ വാട്‌സാപ്പിലെ ഡിപി(ഡിസ്‌പ്ലേ പിക്ചര്‍) ആയി ഉപയോഗിക്കാന്‍ തയാറാക്കിയ ചിത്രം വൈറലായി കഴിഞ്ഞു. നടന്റെ ഇതുവരെ ഹിറ്റായ ചിത്രങ്ങളിലെ കഥാപാത്രങ്ങള്‍ കോര്‍ത്തിണക്കിയാണ് ഡിപി തയാറാക്കിയിരിക്കുന്നത്.
