കേരളം
രാജ്യം ഇന്ന് 72-ാം മത് റിപ്പബ്ലിക് ദിനാഘോഷ നിറവിൽ
രാജ്യം ഇന്ന് 72-ാം മത് റിപ്പബ്ലിക് ദിനാഘോഷ നിറവിൽ. ന്യൂഡൽഹിയിൽ സൈനിക വ്യൂഹങ്ങളും മറ്റ് സുരക്ഷാ വിഭാഗങ്ങളും അണിനിരക്കുന്ന പരേഡ് രാജ്പഥിലൂടെ നീങ്ങും. ഒന്നര ലക്ഷത്തിലധികം കാണികളെ പ്രവേശിപ്പിച്ചിരുന്ന ചടങ്ങിൽ ഇത്തവണ അത് കാൽ ലക്ഷമാക്കി കുറച്ചിരിക്കുകയാണ്. ഒപ്പം പരേഡിന്റെ ദൂരം മൂന്നര കിലോമീറ്ററാക്കി കുറച്ചു. സൈനികരുടെ എണ്ണം 144 പേരുടെ റെജിമെന്റ് എന്നത് 96 ആക്കി കുറച്ചിട്ടുണ്ട്.
ഇന്ത്യൻ റിപ്പബ്ലിക് ദിനാഘോഷത്തിലിത്തവണ രാഷ്ട്രത്തലവന്മാരാരും വിശിഷ്ടാതിഥിയായി പങ്കെടുക്കുന്നില്ല. ബ്രിട്ടീഷ് പ്രധാനമന്ത്രി ബോറിസ് ജോൺസൻ കൊറോണ കാരണം വരവ് റദ്ദാക്കി. രാഷ്ട്രപതി, പ്രധാനമന്ത്രി, പ്രതിരോധമന്ത്രി, ആഭ്യന്തരമന്ത്രി എന്നിവരാണ് റിപ്പബ്ലിക് ദിനാഘോഷങ്ങളുടെ ഏറ്റവും പ്രധാന ശ്രദ്ധാകേന്ദ്രം.
വിവിധ സംസ്ഥാനങ്ങളുടേയും പ്രധാന സർക്കാർ സ്ഥാപനങ്ങളുടേയും കലാരൂപങ്ങളും നിശ്ചല ദൃശ്യങ്ങളും പതിവു പോലെ പ്രദർശിപ്പിക്കും. ഒപ്പം സൈന്യം ആയുധങ്ങളും വാഹനങ്ങളും വിമാനങ്ങളും പ്രദർശിപ്പിച്ചുകൊണ്ട് നീങ്ങും. ബ്രഹ്മോസ് മിസൈൽ വ്യൂഹത്തിന്റെ റെജിമെന്റ് യുദ്ധകാഹളമായി സ്വാമിയേ ശരണം അയ്യപ്പാ എന്ന വിളികളുമായി റിപ്പബ്ലിക് ദിനത്തിലെ വേറിട്ട കാഴ്ചയൊരുക്കും.