ദേശീയം
രാജ്യത്തെ എല്ലാ പോലീസ് സ്റ്റേഷനിലും ലോക്കപ്പിലും സി.സി.ടിവി സ്ഥാപിക്കണം: സുപ്രീംകോടതി
രാജ്യത്തെ എല്ലാ പോലീസ് സ്റ്റേഷനുകളിലും സി.സി.ടിവി കാമറകള്‍ സ്ഥാപിക്കണമന്ന് സുപ്രീംകോടതി.
സി.ബി.ഐ, എന്‍.ഐ.എ, ഇ.ഡി തുടങ്ങിയ അന്വേഷണ ഏജന്‍സികളുടെ ഓഫീസുകളിലും നൈറ്റ് വിഷനും ഓഡിയോ റിക്കാര്‍ഡിംഗും ഉള്ള സി.സി.ടിവി കാമറകള്‍ സ്ഥാപിക്കണമെന്നാണ് സുപ്രീംകോടതിയുടെ നിര്‍ദ്ദേശം.
എല്ലാം പോലീസ് സ്റ്റേഷനുകളിലും ആധുനീക സിസിടിവി കാമറകള്‍ സ്ഥാപിക്കാന്‍ സംസ്ഥാനങ്ങള്‍ മുന്‍കൈ എടുക്കണം.
പ്രതികളെ ചോദ്യം ചെയ്യുന്ന മുറികളിലും ലോക്കപ്പുകളിലും സ്റ്റേഷന്റെ പ്രവേശന കവാടത്തിലും പുറത്തേക്കു പോകുന്ന വഴികളിലും സിസി ടിവി കാമറകള്‍ സ്ഥാപിക്കണമെന്നും സുപ്രീംകോടതി നിര്‍ദേശിച്ചു.
ഈ കാമറകളില്‍ പതിയുന്ന ദൃശ്യങ്ങളും സംഭാഷണങ്ങളും 18 മാസത്തേക്ക് തെളിവുകളായി സൂക്ഷിക്കണമെന്നും നിര്‍ദേശിച്ചിട്ടുണ്ട്.
പഞ്ചാബില്‍ നിന്നുള്ള ഒരു കസ്റ്റഡി മരണവുമായി ബന്ധപ്പെട്ട കേസില്‍ വാദം കേള്‍ക്കവേയാണ് കോടതി ഇക്കാര്യത്തില്‍ കര്‍ശന നിര്‍ദേശം നല്‍കിയത്.
ആറുമാസത്തിനകം നിര്‍ദേശങ്ങള്‍ നടപ്പാക്കിയതിന്റെ റിപ്പോര്‍ട്ട് സംസ്ഥാനങ്ങള്‍ സമര്‍പ്പിക്കണമെന്നും നിര്‍ദേശിച്ചിട്ടുണ്ട്.
