ദേശീയം
ഇന്ത്യയില്‍ നിന്നുള്ളവര്‍ക്ക് നിബന്ധനകളോടെ യാത്രാനുമതി നല്‍കി യു എ ഇ
ഇന്ത്യയില്‍ നിന്നുള്ള യാത്രക്കാര്‍ക്ക് ഏര്‍പ്പെടുത്തിയിരുന്ന വിലക്ക് യു എ ഇ പിന്‍വലിച്ചു. ഇതോടെ ഇരു രാജ്യങ്ങള്‍ക്കുമിടയില്‍ കൂടുതല്‍ വിമാനങ്ങള്‍ സര്‍വീസ് നടത്തും. കൊവിഡിന്റെ രണ്ടാം തരംഗം ഉണ്ടായതിന് ശേഷം ഇന്ത്യയില്‍ നിന്ന് യു എ ഇയിലേക്കുള്ള ആദ്യത്തെ വിമാനം വെള്ളിയാഴ്ച രാവിലെ ഗോവ വിമാനത്താവളത്തില്‍ നിന്ന് പറന്നുയര്‍ന്നു.
ഇന്‍ഡിഗോ എയര്‍ലൈന്‍സ് ദില്ലി ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ നിന്നും ദുബായിയിലേക്കുള്ള വിമാന സര്‍വീസുകളുടെ വിശദാംശങ്ങള്‍ പുറത്തുവിട്ടിട്ടുണ്ട്. യാത്രാവിലക്ക് പിന്‍വലിച്ചെങ്കിലും ഇന്ത്യയില്‍ നിന്നുള്ള എല്ലാ യാത്രികര്‍ക്കും നിരുപാധികം യു എ ഇയിലേക്ക് യാത്ര ചെയ്യാന്‍ കഴിയില്ല. ട്രാന്‍സിറ്റ് യാത്രക്കാര്‍ക്കും യു എ ഇയിലെ സ്ഥിരതാമസക്കാര്‍ക്കും മാത്രമേ നിലവില്‍ ദുബായിയിലേക്ക് യാത്ര ചെയ്യാന്‍ അനുമതിയുള്ളൂ എന്നാണ് ഇന്‍ഡിഗോ തങ്ങളുടെ യാത്രക്കാരെ അറിയിച്ചിരിക്കുന്നത്.
യു എ ഇയിലേക്ക് മൂന്ന് വിമാന സര്‍വീസുകള്‍ ഇന്‍ഡിഗോ പ്രഖ്യാപിച്ചു. ഈ മാസം ഒന്‍പതാം തീയതിയും പത്താം തീയതിയുമായി രണ്ടു വിമാനങ്ങള്‍ ദില്ലിയില്‍ നിന്ന് ദുബായിയിലേക്ക് പറക്കും. യാത്രികര്‍ക്കായി യു എ ഇ നിഷ്കര്‍ഷിക്കുന്ന മാര്‍ഗനിര്‍ദ്ദേശങ്ങളുടെ വിശദാംശങ്ങള്‍ നാഷണല്‍ എമര്‍ജന്‍സി ആന്‍ഡ് ക്രൈസിസ് മാനേജ്‌മെന്റ് അതോറിറ്റി (എന്‍ സി ഇ എം എ) പുറത്തുവിട്ടു. യു എ ഇയില്‍ താമസത്തിന് അനുമതിയുള്ളവര്‍ക്കും കൊവിഡ് വാക്സിന്റെ രണ്ടു ഡോസുകളും സ്വീകരിച്ചവര്‍ക്കും അവരില്‍ തന്നെ രണ്ടാം ഡോസ് സ്വീകരിച്ച്‌ 14 ദിവസം പിന്നിട്ടവര്‍ക്കുമാണ് യാത്രാനുമതി എന്ന് യു എ ഇ നിഷ്കര്‍ഷിക്കുന്നു.
അബുദാബിയില്‍ എത്തുന്ന യാത്രക്കാരെല്ലാം പത്തു ദിവസത്തെ നിര്‍ബന്ധിത സമ്ബര്‍ക്ക വിലക്കില്‍ കഴിയണം. അതുകൂടാതെ, വിമാനത്താവളത്തിലെ അധികൃതര്‍ നല്‍കുന്ന മെഡിക്കലി അപ്രൂവ്ഡ് ട്രാക്കിങ് റിസ്റ്റ്ബാന്‍ഡ് സമ്ബര്‍ക്കവിലക്കില്‍ കഴിയുന്ന ദിവസങ്ങളില്‍ ഉടനീളം യാത്രക്കാര്‍ ധരിക്കണമെന്ന കര്‍ശന നിര്‍ദ്ദേശവും യു എ ഇ നല്‍കുന്നു.
വന്ദേ ഭാരത് മിഷന്റെ ഭാഗമായി ഇന്ത്യ നിരവധി രാജ്യങ്ങളിലേക്ക് നിലവില്‍ അന്താരാഷ്ട്ര വിമാന സര്‍വീസുകള്‍ നടത്തുന്നുണ്ട്. പാകിസ്ഥാന്‍, ശ്രീലങ്ക, നേപ്പാള്‍, നൈജീരിയ, ഉഗാണ്ട എന്നീ അഞ്ച് രാജ്യങ്ങളില്‍ നിന്നുള്ള യാത്രികര്‍ക്ക് കൂടി യു എ ഇ ഇപ്പോള്‍ യാത്രാനുമതി നല്‍കിയിട്ടുണ്ട്. ഇന്ത്യയില്‍ വാണിജ്യ അന്താരാഷ്ട്ര വിമാന സര്‍വീസുകളുടെ പ്രവര്‍ത്തനം തുടര്‍ന്നും നിര്‍ത്തിവെയ്ക്കും.
മഹാരാഷ്ട്ര, തെലങ്കാന, ആന്ധ്ര പ്രദേശ് എന്നീ സംസ്ഥാനങ്ങളില്‍ നിന്നുള്ള യാത്രക്കാര്‍ക്ക് ദില്ലി ഇളവുകള്‍ പ്രഖ്യാപിച്ചു. പുതിയ യാത്രാ മാനദണ്ഡങ്ങള്‍ പ്രകാരം, ഈ സംസ്ഥാനങ്ങളില്‍ നിന്ന് ദില്ലിയില്‍ എത്തുന്ന യാത്രികര്‍ ആര്‍ ടി പി സി ആര്‍ പരിശോധനാ ഫലം സമര്‍പ്പിക്കേണ്ട ആവശ്യമില്ല.
