സ്കൂളുകൾ ഉടൻ തുറക്കുമോ എന്ന് ഇന്ന് അറിയാം

സംസ്ഥാനത്തെ സ്കൂളുകൾ ഉടൻ തുറക്കുമോ എന്ന് ഇന്ന് അറിയാം. മുഖ്യമന്ത്രി വിളിച്ച പ്രത്യേക യോഗം ഇന്ന് ചേരും. പത്ത്, പ്ലസ് ടു ക്ലാസിലുള്ളവർക്കായി സ്കൂൾ തുറക്കുന്ന കാര്യവും ഇവരുടെ പരീക്ഷ നടത്തുന്നത് സംബന്ധിച്ച കാര്യവുമാണ് യോഗത്തിൽ പ്രധാനമായും ചർച്ച ചെയ്യുന്നത്.

മുഖ്യമന്ത്രി വിളിച്ച യോഗത്തിൽ വിദ്യാഭ്യാസമന്ത്രിയും വകുപ്പിലെ ഉദ്യോഗസ്ഥരും പങ്കെടുക്കും. ജനുവരിയോടെ പകുതി കുട്ടികളുമായി ഒന്നിടവിട്ട ദിവസങ്ങളിൽ ക്ലാസ് ആരംഭിക്കാനാണ് നീക്കം. എസ്എസ്എൽസി, പ്ലസ് ടു പരീക്ഷകൾ മാർച്ചിൽ നടത്താനും ആലോചനയുണ്ട്.

പത്ത്, പ്ലസ് ടു ക്ലാസുകളിലെ അൻപത് ശതമാനം അധ്യാപകരോട് ഇന്ന് മുതൽ സ്കൂളിലേക്കെത്താൻ വിദ്യാഭ്യാസവകുപ്പ് ആവശ്യപ്പെട്ടിട്ടുണ്ട്.

കൊവിഡ് സാഹചര്യത്തില്‍ സ്‌കൂളുകള്‍ തുറക്കുന്നത് കുറച്ചുനാളുകളായി നീട്ടിവച്ചിരിക്കുകയായിരുന്നു.