തൃശൂരിൽ വിദ്യാർത്ഥികളെ കാണാതായി; എറണാകുളത്തുള്ളതായി സൂചന

എരുമപ്പെട്ടി ഗവ. ഹയർ സെക്കൻ്ററി സ്കൂളിലെ രണ്ട് വിദ്യാർത്ഥികളെ കാണാതായി. ഒമ്പതാം ക്ലാസ് വിദ്യാർത്ഥികളായ വരവൂർ നീർക്കോലിമുക്ക് വെട്ടുക്കാട് കോളനിയിൽ സുരേഷിൻ്റെ മകൻ അർജുനെയും (14) പന്നിത്തടം നീണ്ടൂർ പൂതോട് ദിനേശൻ്റെ മകൻ ദിൽജിത്തിനെയുമാണ് (14) ഇന്നലെ ഉച്ചയോടെ കാണാതായത്.

ഇവർ എറണാകുളത്തുള്ളതായി സൂചനകളുണ്ട്. വടക്കഞ്ചേരിയിൽ നിന്ന് ട്രെയിനിൽ ഇവർ എറണാകുളത്ത് എത്തിയതാവാനാണ് സാധ്യത എന്നാണ് പൊലീസ് സൂചിപ്പിക്കുന്നത്. ഒരേ ക്ലാസിലെ വിദ്യാർത്ഥികളാണ് ഇരുവരും. കുട്ടികളുടെ ബാഗുകൾ ക്ലാസ് മുറികളിലുണ്ടായിരുന്നു.

സ്കൂൾ അധികൃതരും ബന്ധുക്കളും എരുമപ്പെട്ടി പൊലീസിൽ പരാതി നൽകിയിട്ടുണ്ട്. എരുമപ്പെട്ടി പൊലീസ് നടത്തിയ അന്വേഷണത്തിലാണ് കുട്ടികൾ എറണാകുളത്ത് ഉണ്ടെന്നുള്ള സൂചന ലഭിച്ചത്. വിവരങ്ങൾ ലഭിക്കുന്നവർ 04885273002, 9497980532 എന്നീ നമ്പറുകളിൽ ബന്ധപ്പെടുക.