സംസ്ഥാനത്ത് വീണ്ടും തെരുവുനായ ആക്രമണം;കണ്ണൂരില്‍ 11 കാരിയെ വളഞ്ഞിട്ട് കടിച്ചു

സംസ്ഥാനത്ത് വീണ്ടും തെരുവുനായ ആക്രമണം. കണ്ണൂര്‍ പിലാത്തറയില്‍ 11 വയസ്സുകാരിയെ തെരുവുനായകള്‍ വളഞ്ഞിട്ട് ആക്രമിച്ചു. പിലാത്തറ മേരി മാത സ്‌കൂളിലെ ആറാം ക്ലാസ് വിദ്യാര്‍ഥിനി ആയിഷയാണ് കടിയേറ്റത്.

രാവിലെ മദ്രസയില്‍നിന്നു വീട്ടിലേക്ക് പോകുമ്പോള്‍ ദേശീയപാതയ്ക്ക് സമീപത്തു വെച്ചായിരുന്നു ആക്രമണം. നിലവിളി കേട്ടെത്തിയ പരിസരവാസികളാണ് കുട്ടിയെ നായ്ക്കളില്‍ നിന്ന് രക്ഷിച്ചത്. കാലിന് കടിയേറ്റ ആയിഷയെ പരിയാരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

പാലക്കാട്ടും തെരുവുനായ ആക്രമണം ഉണ്ടായി. പാലക്കാട് 71 കാരനായ കുടപ്പുരോഗിയെ വീട്ടില്‍ കയറിയാണ് തെരുവുനായ കടിച്ചത്.