കേരളം
ജനദ്രോഹത്തിന്റെ ഏഴുവർഷങ്ങൾ, പ്രതിഷേധം ശക്തമാക്കും; കെ.സുരേന്ദ്രൻ
തിരുവനന്തപുരം. കേരളത്തില്‍ ജനങ്ങള്‍ക്ക് ജീവിക്കുവാന്‍ സാധിക്കാത്ത രിതിയിലുള്ള സാഹചര്യം സൃഷ്ടിച്ചുകൊണ്ടാണ് പിണറായി സര്‍ക്കാര്‍ എട്ടാം വര്‍ത്തിലേക്ക് കടക്കുന്നതെന്ന് ബിജെപി സംസ്ഥനഅധ്യക്ഷന്‍ കെ സുരേന്ദ്രന്‍. ഭരണത്തകര്‍ച്ചയും അരാജകതവും മാത്രമാണ് ഇടത് സര്‍ക്കാരിന്റെ കൈമുതല്‍. 4000 കോടിയുടെ അധിക നികുതിയാണ് എട്ടാം വര്‍ഷത്തില്‍ ചുമത്തിയത്. സംസ്ഥാനത്ത് ഉപ്പ് തൊട്ട് കര്‍പ്പൂരത്തിന് വരെ വിലക്കൂട്ടി. സമാനതകളില്ലാത്ത അഴിമതിയും സ്വജനപക്ഷപാതവും സര്‍ക്കാര്‍ നടത്തി.
തൊട്ടടുത്ത സംസ്ഥാനങ്ങളിലും മാഹിയിലും കേരളത്തിനെ അപേക്ഷിച്ച് 12-15 രൂപയാണ് ഒരു ലിറ്റർ പെട്രോളിനും ഡീസലിനും കുറവ് വരുന്നത്. കെട്ടിട നിർമാണ മേഖലയിലാവട്ടെ റോക്കറ്റ് നികുതി വർധനവാണ് പിണറായി സർക്കാർ നടപ്പിലാക്കിയിരിക്കുന്നത്. അരിക്കും പച്ചക്കറിക്കും ഉൾപ്പെടെ പൊള്ളുന്ന വിലയാണ് ഇന്ന് കേരളത്തിലുള്ളത്. വെള്ളക്കര വർധനവ് നാട്ടുകാരുടെ നട്ടെല്ലൊടിച്ചു നിൽക്കുമ്പോഴാണ് അടുത്ത മാസം വീണ്ടും വൈദ്യുതി ചാർജ് വർധിപ്പിക്കാൻ സർക്കാർ തീരുമാനമെടുത്തത്. സമാനതകളില്ലാത്ത അഴിമതിയും സ്വജനപക്ഷപാതവും നടത്തി ഈ സർക്കാർ കേരളത്തെ തകർക്കുകയാണ്. പിണറായി സർക്കാരിൻ്റെ എല്ലാ വകുപ്പുകളും പൂർണ പരാജയമാണ്. ആഭ്യന്തര വകുപ്പ് കൈകാര്യം ചെയ്യുന്നതിൽ മുഖ്യമന്ത്രി ദയനീയമായി പരാജയപ്പെട്ടു. പൊലീസുകാർ ലഹരിമാഫിയകൾക്കും ഗുണ്ടകൾക്കും വേണ്ടി വിടുപണി ചെയ്യുകയാണ്. ഏറ്റവും ഒടുവിലത്തെ ഉദാഹരണമാണ് കൊട്ടാരക്കര താലൂക്ക് ആശുപത്രിയിലെ ഡോക്ടർ വന്ദനയുടെ കൊലപാതകം.
സംസ്ഥാനത്ത് ആദിവാസികള്‍ക്കെതിരായ ആക്രമണം വര്‍ധിക്കുകയാണ്. സര്‍ക്കാര്‍ ശക്തമായ നടപടി സ്വീകരിക്കാത്തതാണ് പ്രശ്‌നങ്ങള്‍ക്ക് കാരണം. ഒരു ദിവസം 47 സ്ത്രീകള്‍ വിവിധ തരം അതിക്രമങ്ങള്‍ക്ക് ഇരയാകുന്നുണ്ടെന്നും അദ്ദേഹം പറഞ്ഞു. സ്ത്രീകള്‍ക്കെതിരെ അതിക്രമം നടത്തുന്നവരില്‍ ഡിവൈഎഫ്‌ഐ പ്രവര്‍ത്തകരാണെന്നും അദ്ദേഹം പറഞ്ഞു.
