കേരളം
എന്ജിനീയറിങ്, ഫാര്മസി എന്ട്രന്സ് പരീക്ഷാഫലം പ്രഖ്യാപിച്ചു
എന്ജിനീയറിങ്, ഫാര്മസി, ആര്ക്കിടെക്ട് എന്ട്രന്സ് പരീക്ഷാ ഫലം പ്രഖ്യാപിച്ചു. 51031 വിദ്യാര്ഥികള് യോഗ്യത നേടി. 47629 പേര് റാങ്ക് ലിസ്റ്റില് ഉള്പ്പെട്ടു. 73977 പേരാണ് പരീക്ഷ എഴുതിയത്. ഉന്നത വിദ്യാഭ്യാസ മന്ത്രി ആര്. ബിന്ദുവാണ് ഫലം പ്രഖ്യാപിച്ചത്.
എന്ജിനീയറിങ്ങിന് വടക്കാഞ്ചേരി സ്വദേശി ഫെയിസ് ഹാഷിമിനാണ് ഒന്നാം റാങ്ക്. രണ്ടാം റാങ്ക് കോട്ടയം സ്വദേശി ഹരിശങ്കറിനാണ്. മൂന്നാം റാങ്ക് നയന് കിഷോറിനും (കൊല്ലം) നാലാം റാങ്ക് കെ. സഹലിനുമാണ് (മലപ്പുറം). ആദ്യ നൂറ് റാങ്കില് 78 പേര് ആണ്കുട്ടികളാണ്.
ഫാര്മസിയില് ഒന്നാം റാങ്ക് ഫാരിസ് അബ്ദുള് നാസര് കല്ലയിലിനാണ്. തേജസ്വിനി വിനോദ് രണ്ടാം റാങ്കും അക്ഷര ആനന്ദ് മൂന്നാം റാങ്കും കരസ്ഥമാക്കി. ആര്കിടെക്ടില് തേജസ് ജോസഫ് ഒന്നാം റാങ്ക് നേടി. അമ്പിളി രണ്ടാം റാങ്കും ആദിനാഥ് ചന്ദ്ര മൂന്നാം റാങ്കും സ്വന്തമാക്കി.
എന്ജിനീയറിങ്ങില് ആദ്യ 5000 റാങ്കില് 2112 കുട്ടികള് കേരള ഹയര്സെക്കന്ഡറിയില് പാസായി യോഗ്യത നേടിയവരാണ്. ഒന്നാം റാങ്ക് നേടിയ ഫെയിസ് ഹാഷിമിനെ മന്ത്രി ആര്. ബിന്ദു ഫോണില് വിളിച്ച് അഭിനന്ദിച്ചു. ഒക്ടോബര് 11നാണ് ആദ്യ അലോട്ട്മെന്റ്. ഒക്ടോബര് 25-നകം പ്രവേശനം പൂര്ത്തിയാക്കും. റാങ്ക് പട്ടിക cee.kerala.gov.in എന്ന വെബ്സൈറ്റില് ലഭ്യമാണ്.