സംസ്ഥാനത്ത് പെട്രോൾ വില 100 കടന്നു

സംസ്ഥാനത്ത് പെട്രോൾ വില 100 കടന്നു. പാറശാലയിലാണ് ആദ്യമായി പെട്രോൾ വില സെഞ്ച്വറി അടിച്ചത്. ഇന്ന് 100. 04 രൂപയാണ് പാറശാലയിലെ ഒരു ലിറ്ററിന്റെ വില. ഇന്ന് പെട്രോൾ വില 26 പൈസ കൂടിയതോടെയാണ് വില പുതിയ ഉയരങ്ങളിൽ എത്തിയത്.

വെറും 132 ദിവസങ്ങൾ കൊണ്ടാണ് 90 രൂപയുണ്ടായിരുന്ന പെട്രോൾ വില 100 കടന്നത്. തിരുവനന്തപുരത്തും പെട്രോൾ വില 100 ന് അടുത്താണ്. 99. 80 രൂപയാണ് വില. കൊച്ചിയിൽ പെട്രോളിന് 97. 86 രൂപയായി ഉയർന്നു. കൂടാതെ ഡീസലിന് 8 പൈസയും കൂടി.

ഇതോടെ ഒരു ലിറ്റർ ഡീസലിന് തിരുവനന്തപുരത്ത് 95.62 രൂപയും കൊച്ചിയിലെ 94. 79 യും നൽകണം. 22 ദിവസത്തിനിടെ 12ാം തവണയാണ് ഇന്ധന വില കൂടുന്നത്.

കഴിഞ്ഞ 53 ദിവസത്തിനിടെ 29 തവണയാണ് എണ്ണകമ്പനികൾ വില കൂട്ടിയത്. അഞ്ച് സംസ്ഥാനങ്ങളിലെ നിയമസഭ തെരഞ്ഞെടുപ്പ് ഫലം പ്രഖ്യാപിച്ചതിന് പിന്നാലെ മേയ് നാലിനാണ് എണ്ണവില വീണ്ടും വർധിപ്പിക്കാൻ തുടങ്ങിയത്.