കാൻസർ ചികിത്സയിലുള്ള ഒരു വയസ്സുകാരിക്കായി ബക്കറ്റ് പിരിവ്; പണം തട്ടി മൂവർ സംഘം

കാൻസർ ചികിത്സയിലുള്ള ഒരു വയസ്സുകാരിയുടെ ചിത്രം വച്ച് അനധികൃത പണപ്പിരിവ് നടത്തിയ സംഘം അറസ്റ്റിൽ. രക്താർബുദം ബാധിച്ച് തിരുവനന്തപുരം ആർ സി സിയിൽ ചികിത്സയിൽ കഴിയുന്ന കൊല്ലം പന്മന സ്വദേശിനിയായ ഒരു വയസ്സുകാരിയുടെ ചിത്രം ഉപയോഗിച്ചായിരുന്നു തട്ടിപ്പ്. പരിച്ച പണവുമായി മൂന്നംഗ സംഘം ഉടൻ തന്നെ ബാറിൽ മദ്യപിക്കാൻ കയറിയതോടെയാണ് പിടിവീണത്.

മലപ്പുറം ചെമ്മൻകടവ് സ്വദേശി സഫീർ, കോട്ടയം ഒളശ സ്വദേശി ലെനിൽ, ചെങ്ങളം സ്വദേശി ജോമോൻ എന്നിവരാണ് പിടിയിലായത്. ചികിത്സയ്ക്ക് സഹായം തേടി കുഞ്ഞിന്റെ അച്ഛൻ ഫെയ്സ്ബുക്കിൽ കുറിപ്പിട്ടിരുന്നു. ഈ കുറിപ്പിനൊപ്പമുള്ള ചിത്രം വച്ച് ഫ്ളക്സ് അടിച്ച് നാട്ടുകാർക്കിടയിൽ ബക്കറ്റ് പിരിവ് നടത്തുകയായിരുന്നു സംഘം.

ഇവരെ ബാറിൽ വച്ച് കണ്ട നാട്ടുകാരിൽ ഒരാളാണ് സംശയം തോന്നി പൊലീസിനെ വിവരം അറിയിച്ചത്.
കുട്ടിയുടെ പിതാവിനെ പൊലീസ് ഫോണിൽ ബന്ധപ്പെട്ടപ്പോഴാണ് മൂവർ സംഘത്തിന്റെ തട്ടിപ്പ് മനസ്സിലായത്. മുമ്പും സമാനമായ തട്ടിപ്പ് നടത്തിയിട്ടുണ്ടെന്ന് ചോദ്യം ചെയ്യലിൽ ഇവർ സമ്മതിച്ചു.