കേരളം
ഞാനെന്തായാലും ജയിക്കും; ബിജെപി 40 സീറ്റുകള്‍ നേടുമെന്ന് ഇ ശ്രീധരൻ
കേരള നിയമസഭാ തെരഞ്ഞെടുപ്പില്‍ താനെന്തായാലും വിജയിക്കുമെന്നും ബിജെപി 40 സീറ്റുകള്‍ നേടുമെന്ന് പ്രതീക്ഷിക്കുന്നതായും ഇത് 75 വരെ പോയേക്കാമെന്നും എന്‍ഡിഎ പാലക്കാട് മണ്ഡലം സ്ഥാനാര്‍ത്ഥി ഇ ശ്രീധരന്‍.
കേരള നിയമസഭാ തെരഞ്ഞെടുപ്പിലെ കിങ് മേക്കറാകും ബിജെപിയെന്നും ഇ ശ്രീധരന്‍ പറഞ്ഞു. ബിജെപി അധികാരത്തില്‍ വരാന്‍ നല്ല സാധ്യത കാണുന്നുണ്ട്, ഏറ്റവും കുറഞ്ഞത് കിങ് മേക്കറെങ്കിലും ആകും, ബിജെപി ആയിരിക്കും കേരളം ആര് ഭരിക്കണമെന്ന് തീരുമാനിക്കുകയെന്നും ഇ ശ്രീധരന്‍ പറഞ്ഞു.
തന്നെ പോലെ പ്രശസ്തനും കഴിവും പെരുമയുമുള്ള ആള്‍ ബിജെപിയില്‍ ചേര്‍ന്നതോടെ പാര്‍ട്ടിയുടെ പ്രതിച്ഛായ തന്നെ മാറിയിട്ടുണ്ടെന്നും ഇ ശ്രീധരന്‍ പ്രതികരിച്ചു.
താന്‍ മുഖ്യമന്ത്രിയാകണമോയെന്ന കാര്യം പാര്‍ട്ടിയാണ് തീരുമാനിക്കേണ്ടതെന്നും താന്‍ അക്കാര്യം ആവശ്യപ്പെട്ടിട്ടില്ലെന്നും അവര്‍ക്ക് വേണമെങ്കില്‍ ആ ചുമതല ഏറ്റെടുക്കാമെന്നും അദ്ദേഹം പ്രതികരിച്ചു.
