കേരളം
പി എസ് സി വിവിധ വകുപ്പുകളില്‍ ജൂലായ് 10 ന് നടത്താൻ നിശ്ചയിച്ചിരുന്ന ഡ്രൈവർ പരീക്ഷ മാറ്റി
വിവിധ വകുപ്പുകളില്‍ ഡ്രൈവര്‍ നിയമനത്തിനായി ജൂലായ് പത്തിന് നടത്താൻ നിശ്ചയിച്ചിരുന്ന പരീക്ഷ മാറ്റിവെച്ചതായി പിഎസ് സി. മാറ്റിവെച്ച ഒഎംആർ പരീക്ഷ ഓഗസ്റ്റ് 17 ന് നടക്കും. ശനി, ഞായര്‍ ദിവസങ്ങളില്‍ സമ്പൂര്‍ണ ലോക്ഡൗണായതിനാലാണ് പരീക്ഷ മാറ്റിയത്.
പുതിയ അഡ്മിഷന്‍ ടിക്കറ്റ് ഓഗസ്റ്റ് മൂന്നുമുതല്‍ ഉദ്യോഗാര്‍ഥികള്‍ക്ക് പ്രൊഫൈലില്‍ നിന്ന് ഡൗണ്‍ലോഡ് ചെയ്യാമെന്ന് പി എസ് സി അറിയിച്ചു. 14 ജില്ലകളിലുമായി അരലക്ഷത്തോളം പേര് എഴുതുന്ന വലിയ പരീക്ഷയാണിത്.
ജൂലായില്‍ നേരത്തേ നിശ്ചയിച്ച പരീക്ഷകള്‍ മാറ്റമില്ലാതെ നടക്കും. രണ്ടരമാസത്തിനുശേഷം ജൂലായ് ഒന്നിനാണ് പരീക്ഷകള്‍ പി.എസ്.സി. പുനരാരംഭിക്കുന്നത്. അന്ന് റെയ്ഞ്ച് ഫോറസ്റ്റ് ഓഫീസര്‍ പരീക്ഷ നടത്തും.
ഡ്രൈവര്‍ പരീക്ഷ മാറ്റിയതോടെ 29 പരീക്ഷകള്‍ ജൂലായില്‍ നടത്തണം. സംഗീത കോളേജുകളില്‍ ലക്ചറര്‍ ഇന്‍ ഡാന്‍സ് (കേരളനടനം) റാങ്ക്പട്ടിക തയ്യാറാക്കാന്‍ അഭിമുഖം നടത്തുമെന്നും കമ്മീഷന്‍ തീരുമാനിച്ചിട്ടുണ്ട്.
