കേരളം
ബ്രിട്ടനില് നിന്ന് കേരളത്തിൽ എത്തിയ എട്ടുപേര്ക്ക് കൊവിഡ്
![new corona](https://citizenkerala.com/wp-content/uploads/2020/12/new-corona.jpg)
ബ്രിട്ടനില് നിന്നെത്തിയ എട്ടുപേര്ക്ക് കൊവിഡ് പോസിറ്റീവായതായി ആരോഗ്യ വകുപ്പ് മന്ത്രി കെ.കെ. ശൈലജ. ജനിതക മാറ്റം സംഭവിച്ച വൈറസാണോ ബാധിച്ചിരിക്കുന്നത് എന്ന് മനസിലാക്കാന് സാമ്പിളുകള് പൂനൈയിലേക്ക് അയച്ചിട്ടുണ്ട്. വിമാനത്താവളങ്ങളില് ശ്രദ്ധ കൂട്ടിയിട്ടുണ്ടെന്നും ജനിതക മാറ്റം സംഭവിച്ച വൈറസിനും നിലവിലെ വാക്സിന് ഫലപ്രദമാണെന്നാണ് വിദഗ്ധരുടെ അഭിപ്രായമെന്നും ആരോഗമന്ത്രി പറഞ്ഞു.
Read also: കോവിഡ് 2 വൈറസ് വകഭേദം; ജാഗ്രതയോടെ സംസ്ഥാന ആരോഗ്യ വകുപ്പ്
സംസ്ഥാനത്ത് കൊവിഡ് കേസുകളില് വര്ധനവുണ്ടെന്നും കെ.കെ. ശൈലജ മുന്നറിയിപ്പ് നല്കി. യുകെയില് നിന്ന് വന്ന എല്ലാവരെയും കര്ശന നിരീക്ഷണത്തിലാക്കും. എയര്പോര്ട്ടുകളില് കര്ശന പരിശോധന ഏര്പ്പെടുത്തും. ജനിതക മാറ്റം സംഭവിച്ച വൈറസ് യുകെയില് റിപ്പോര്ട്ട് ചെയ്തുവെന്ന വാര്ത്ത വരുന്നതിന് മുന്പും സംസ്ഥാനത്തേക്ക് എത്തിയവരെയും കര്ശന നിരീക്ഷണത്തിലാക്കുമെന്നും മന്ത്രി അറിയിച്ചു.
അതേസമയം ബ്രിട്ടനില് സാര്സ് കോവിഡ്-2 (SARS-CoV-2) വൈറസിന്റെ ജനിതക വകഭേദം (Multiple spike protein mutations) കണ്ടെത്തിയ സാഹചര്യത്തില് കേരളത്തിലെ സാഹചര്യം വിലയിരുത്താന് ഉന്നതതലയോഗം കൂടി. ഇപ്പോഴത്തെ കോവിഡ്-19നെക്കാളം 70 ശതമാനത്തിലധികം വ്യാപന ശേഷിയുള്ള വൈറസാണ് വകഭേദം വന്ന വൈറസ്. മാത്രമല്ല പുതിയതരം വൈറസിന്റെ രോഗ തീവ്രതാ സാധ്യതയെപ്പറ്റിയുള്ള പഠനം നടന്നു വരുന്നതേയുള്ളൂ. കൊറോണ വൈറസ് ആദ്യം റിപ്പോര്ട്ട് ചെയ്ത സംസ്ഥാനമാണ് കേരളം.
Read also: രാജ്യത്ത് കോവിഡ് കേസുകൾ കുറയുന്നു; പ്രതിദിന കണക്കിൽ മുന്നില് കേരളം
വയോജനങ്ങളും മറ്റുപല രോഗമുള്ളവരും സംസ്ഥാനത്ത് ധാരാളമുള്ളതിനാല് രോഗം വന്നുകഴിഞ്ഞാല് അവരെ ഗുരുതരമാക്കും. ആരോഗ്യമുള്ളവര്ക്ക് പോലും പലതരം ആരോഗ്യ പ്രശ്നങ്ങള് സൃഷ്ടിച്ചിട്ടുണ്ട്. ആ ഒരു സാഹചര്യത്തില് നിലവിലെ കോവിഡ് വ്യാപനം വിലയിരുത്താനും പുതിയ വൈറസിന്റെ പശ്ചാത്തലത്തില് പ്രതിരോധ പ്രവര്ത്തനങ്ങളും ചികിത്സയും ശക്തിപ്പെടുത്താനുമാണ് യോഗം കൂടിയത്.
എയര്പോര്ട്ടിലും സീപോര്ട്ടിലും നിരീക്ഷണം ശക്തമാക്കുന്നതാണ്. എയര്പോട്ടിനോടനുബന്ധിച്ചുള്ള കോവിഡ് പരിശോധനാ സംവിധാനം ശക്തിപ്പെടുത്തും. നാല് എയര്പോര്ട്ടുകള് കേന്ദ്രീകരിച്ചും കിയോസ്കുകള് ആരംഭിക്കും. യുകെ ഉള്പ്പെടെയുള്ള യൂറോപ്യന് രാജ്യങ്ങളില് നിന്നും വരുന്നവരുടെ കോവിഡ് പരിശോധന ശക്തമാക്കും. യു.കെ.യില് നിന്നും മറ്റേതെങ്കിലും രാജ്യങ്ങള് വഴിയും വരുന്നവരെ കണ്ടെത്താന് സര്വൈലന്സ് സംവിധാനം ശക്തിപ്പെടുത്തിയിട്ടുണ്ട്.
14 ദിവസത്തിനുള്ളില് യൂറോപ്യന് രാജ്യങ്ങളില് നിന്നും വന്നവരെ കണ്ടെത്തി നിരീക്ഷിക്കുന്നതാണ്. 14 ദിവസത്തിന് മുമ്പ് ഇവിടെ എത്തിച്ചേര്ന്ന ആളുകളേയും പ്രത്യേക നിരീക്ഷണത്തല് കൊണ്ടുവരേണ്ടതാണ്. ഇവിടെ നിന്നും വന്നവരുടെ ക്വാറന്റൈന് ശക്തിപ്പെടുത്തും. ക്വാറന്റൈനിലുള്ള എല്ലാവരും നിര്ദേശങ്ങള് കര്ശനമായി പാലിക്കേണ്ടാണ്.
എല്ലാ മെഡിക്കല് ഓഫീസര്മാരും നിരന്തരം കാര്യങ്ങള് വിലയിരുത്തുന്നതാണ്. ജീവനക്കാര് കര്ശനമായും സുരക്ഷ മാനദണ്ഡങ്ങള് പാലിക്കേണ്ടതാണ്. മരുന്നുകള്, സുരക്ഷാ ഉപകരണങ്ങള്, ജീവന്രക്ഷാ ഉപകരണങ്ങള് എന്നിവയുടെ ലഭ്യത ഉറപ്പ് വരുത്തിയിട്ടുണ്ട്.