Covid 19
സംസ്ഥാനത്ത് ആശങ്കയായി ആന്ത്രാക്സും ; ആനക്കട്ടിയില് രക്തമൊലിച്ച നിലയില് കാട്ടാനയുടെ ജഡം
കോവിഡിനും സികയ്ക്കും പിന്നാലെ കേരളത്തില് ആന്ത്രാക്സും. പാലക്കാട്- കോയമ്പത്തൂര് വന അതിര്ത്തിയില് കാട്ടാനയെ ചരിഞ്ഞ നിലയില് കണ്ടെത്തിയത് ആന്ത്രാക്സ് ബാധിച്ചെന്ന് സ്ഥിരീകരിച്ചു. അതിര്ത്തിയിലെ ആനക്കട്ടിയിലാണ് കാട്ടാനയുടെ ജഡം കണ്ടെത്തിയത്. മൂക്കിലും വായിലും രക്തം ഒലിച്ച നിലയിലായിരുന്നു കാട്ടാനയുടെ ജഡം. ഇതേത്തടുര്ന്ന് കേരളത്തിന്റെ വനമേഖലകളില് ജാഗ്രതാ നിര്ദേശം പുറപ്പെടുവിച്ചു.
മൃഗങ്ങളില്നിന്ന് മനുഷ്യരിലേക്ക് പകരുന്ന രോഗമാണ് ആന്ത്രാക്സ്. മണ്ണിലുള്ള രോഗാണുക്കള് (spores) ആഹാരത്തിലൂടെ അന്നപഥത്തിലെത്തുമ്പോഴാണ് മൃഗങ്ങളില് രോഗം ഉണ്ടാവുന്നത്. മാരകമായ ഈ രോഗം പിടിപെട്ടാല് രോഗിയുടെ രക്തത്തില് രോഗാണുക്കള് പെറ്റുപെരുകുന്നു.
ചിലപ്പോഴൊക്കെ തൊലിപ്പുറത്ത് അവിടവിടെയായി കുരുക്കള് ഉണ്ടാവുകയും ചെയ്യും. രോഗം പിടിപെട്ട മൃഗങ്ങള് അവയുടെ വായ്, മൂക്ക്, മലാശയം എന്നിവയിലൂടെ രോഗാണുക്കളെ പുറത്തേക്ക് കളയുന്നു. ഇവ മണ്ണില് കലര്ന്ന് വളരെക്കാലം രോഗാണുബാധയുടെ ഉത്ഭവസ്ഥാനമായി വര്ത്തിക്കുന്നു.
രോഗാണുക്കള് കലര്ന്ന മണ്ണ്, പൊടി, വെള്ളം, വായു എന്നിവയിലൂടെ മനുഷ്യരിലും പകരുന്നു. മൃഗങ്ങളില്നിന്ന് പ്രത്യക്ഷമായോ പരോക്ഷമായോ ഈ രോഗം ഉണ്ടാവാം. തൊലിയിലൂടെ പകരുന്ന ക്യൂട്ടേനിയസ്, ആന്ത്രാക്സ്, ശ്വാസകോശത്തിലൂടെ പകരുന്ന പള്മണറി ആന്ത്രാക്സ്, കുടല്സംബന്ധമായി പകരുന്ന ഇന്റസ്റ്റെനല് ആന്ത്രാക്സ് എന്നീ മൂന്നു തരത്തിലാണ് രോഗം സാധാരണ കണ്ടുവരുന്നത്.